TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
Bu gün Azərbaycanda prezident seçkiləri keçirilir
Bakı, 11 aprel, AZƏRTAC Aprelin 11-də səhər saat 8.00-da ölkəmizin bütün ərazisində Azərbaycan Respublikası Prezidentinin seçkiləri başlayıb. Prezident postu uğrunda 8 namizəd mübarizə aparır. AZƏRTAC xəbər verir ki, səsvermə 125 seçki dairəsi üzrə 5641 seçki məntəqəsində keçirilir. Bu məntəqələrdən 5426-sı daimi fəaliyyət göstərir, 215-i Azərbaycanın xarici ölkələrdəki səfirlik, konsulluq və daimi nümayəndəliklərində, hərbi hissələrdə, islah-əmək və sanator-müalicə müəssisələrində, Azərbaycanın bayrağı altında Xəzər dənizində və dünya sularında üzən gəmilərdə yaradılmış məntəqələrdir. Zəruri avadanlıqla təmin edilmiş məntəqələrə 5 milyon 347 min 803 seçki bülleteni paylanılıb. Dairə seçki komissiyalarının hamısı kompüterləşdirilib və digər lazımi avadanlıqla təmin olunub. Səsvermə günü beş dəfə - saat 10.00-da, 12.00-da, 15.00-da, 17.00-da və 19.00-da Mərkəzi Seçki Komissiyasının İnformasiya Mərkəzinin informasiya zalından seçkilərin gedişinə dair operativ məlumatlar yayımlanacaq. Səsvermənin şəffaflığını təmin etmək üçün 1000 seçki məntəqəsində quraşdırılmış veb-kameralar MSK-nın rəsmi internet səhifələrinə (www.msk.gov.az; www.cec.gov.az; www.infocenter.gov.az) qoşulub. Bu kameralar vasitəsilə seçki məntəqələrində səsvermənin gedişini (səsvermə kabinəsində bülletenlərin doldurulması prosesi istisna olmaqla) əvvəldən axıradək Mərkəzi Seçki Komissiyasının internet saytlarında izləmək mümkündür. Veb-kameralar quraşdırılmış seçki məntəqələrinin siyahısı mətbuatda dərc olunub və MSK-nın internet səhifələrində yerləşdirilib. Hazırda Azərbaycanda səsvermə hüququ olan vətəndaşların sayı 5 milyon 314 min 365 nəfərdir. Seçki prosesini 894 beynəlxalq müşahidəçi izləyir. Onlar 61 beynəlxalq təşkilatı və 59 ölkəni təmsil edirlər. Yerli müşahidəçilərin ümumi sayı isə 58175-dir. Seçkiləri 50-dən çox xarici KİV-in 118 təmsilçisi işıqlandırır. Səsvermə saat 19:00-da başa çatacaq.
 
Bakıda prezident seçkilərində KİV-lərin rol və vəzifələrinə həsr edilən seminar-müşavirə keçirilib
Bakı, 19 mart, AZƏRTAC Martın 19-da Bakıda Azərbaycan Respublikası Prezidenti seçkilərində kütləvi informasiya vasitələrinin rol və vəzifələrinə həsr edilən seminar-müşavirə keçirilib. AZƏRTAC xəbər verir ki, seminar-müşavirə Azərbaycan Respublikası Prezidentinin Administrasiyası, Mərkəzi Seçki Komissiyası (MSK), Milli Televiziya və Radio Şurası və Mətbuat Şurası tərəfindən birgə təşkil olunub. Tədbirdə yuxarıda adları qeyd olunan qurumların nümayəndələri, kütləvi informasiya vasitələrinin rəhbərləri, jurnalistlər, fəal sosial şəbəkə istifadəçiləri, bloqqerlər, beynəlxalq təşkilatların təmsilçiləri iştirak ediblər. Seminar-müşavirəni açan MSK sədri Məzahir Pənahov deyib ki, seçki prosesi ilə bağlı məlumatların ictimaiyyətə düzgün çatdırılması çox vacib məsələdir. Bu işdə kütləvi informasiya vasitələrinin üzərinə böyük vəzifə düşür. Azərbaycanda kütləvi informasiya vasitələri seçkilərlə bağlı kifayət qədər təcrübə toplayıb, jurnalistlər peşəkarlaşıblar. Mərkəzi Seçki Komissiyası da media ilə birgə işləməyə hər zaman xüsusi diqqət göstərir. MSK sədri prezident seçkilərində səsvermənin 5600-ə yaxın məntəqədə keçiriləcəyini söyləyib. O deyib ki, ümumi seçici siyahısına daxil edilmiş seçicilərin sayı 5 milyon 300 mindən çoxdur. Artıq kifayət qədər beynəlxalq müşahidəçi qeydiyyata alınıb. Onların arasında ATƏT-in Demokratik Təsisatlar və İnsan Haqları Bürosunun uzunmüddətli müşahidəçiləri də var. Büronun 280 qısamüddətli müşahidəçisi səsverməyə bir neçə gün qalmış Azərbaycana gələcək. Eyni zamanda, 1000 seçki məntəqəsində veb-kameralar quraşdırılıb. Veb-kameralar seçkilərin şəffaf təşkili baxımından çox böyük əhəmiyyət kəsb edir. Bu, o deməkdir ki, dünyanın istənilən nöqtəsində Azərbaycandakı seçki məntəqələrinin 20 faizində seçki prosesini izləmək mümkün olacaq. Əminik ki, bu praktika əvvəlki seçkilərdə olduğu kimi, 11 aprel prezident seçkilərində də özünü yüksək səviyyədə doğruldacaq. Bütün bunlar siyasi iradənin təzahürüdür. İstənilən demokratik ölkədə şəffaf seçkinin keçirilməsi üçün qanunvericilik bazası ilə, atılan addımlarla yanaşı, siyasi iradə də vacib şərtdir. Azərbaycanın kütləvi informasiya vasitələri indiyə qədər öz işlərinin öhdəsindən layiqincə gəlib. İnanıram ki, bu seçkilər zamanı da jurnalistlər özlərini xalqına xidmət edən bir qurumun nümayəndələri kimi hiss edəcəklər. Azərbaycanda seçki ilə bağlı əldə olunan nailiyyətlərdə KİV-lərin böyük rolu var. Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov seminar-müşavirədə çıxış edərək deyib ki, ölkəmizdə keçirilən seçkilərin bütün mərhələlərində kütləvi informasiya vasitələri mühüm rol oynayır. Hər bir seçki üç mərhələdən ibarətdir: təşviqataqədərki mərhələ, təşviqat dövrü və bilavasitə səsvermənin başlanması, keçirilməsi və nəticələrin elan olunması. Hər bir dövr üçün Seçki Məcəlləsində kütləvi informasiya vasitələrinin rolu, vəzifələri, məsuliyyəti göstərilir. Bu seminar-müşavirədə Seçki Məcəlləsinin tələbləri, onun müəyyən etdiyi məsuliyyət diqqətə çatdırılacaq. Əli Həsənov qeyd edib ki, bu gündən Azərbaycan cəmiyyətində seçki ilə bağlı mühüm obyekt və subyektlər var. Birincisi, namizədlər və onun platformasıdır. Hər bir namizəd öz proqram və hədəflərini, fikir və mülahizələrini ictimaiyyətə kütləvi informasiya vasitələri ilə çatdırmalıdır. Namizədlər televiziyada debatlar keçirəcək, bölgələrdə seçicilərlə görüşəcək, ancaq həmin məkana bir qrup insan yığışacaq və bütövlükdə, görüşün nəticələrini yenə də ictimaiyyətə mətbuat çatdıracaq. Bu baxımdan, KİV-lərin rolu prezident seçkilərində iştirak edən namizədlərin roluna bərabərdir. KİV-lər bütün namizədlər üçün bərabər şərait yaratmalıdır. Prezidentin köməkçisi qeyd edib ki, Seçki Məcəlləsində media nümayəndələrinin vəzifələri müəyyən olunur. Əsas vəzifə bu işi peşəkarcasına, Məcəllənin tələblərinə uyğun yerinə yetirməkdir. Media nümayəndələrinin bu işi həyata keçirməsindən asılı olaraq seçkilərin imici formalaşacaq. Seçkilər mühüm ümumxalq tədbiridir və KİV-lər bu məsələdə çox məsuliyyətli olmalıdır. Kütləvi informasiya vasitələri diqqətli olmalıdır ki, Seçki Məcəlləsinin müddəaları pozulmasın. Çünki Məcəllənin hansısa tələbinə riayət etməmək seçkilərin ümumi imicinə xələl gətirə bilər. Əli Həsənov vurğulayıb ki, KİV-lər Prezidentin dövlət başçısı kimi cari fəaliyyəti ilə seçkilərdə namizəd kimi təşviqat fəaliyyəti arasında fərqi düzgün müəyyən etməli, diqqətli olmalıdırlar. Prezidentin köməkçisi əlavə edib ki, kommersiya məsələsində də namizədlər üçün bərabər şərait yaradılmalıdır. Bu məsələdə də Seçki Məcəlləsinin tələblərinə əməl olunmalıdır. Milli Televiziya və Radio Şurasının sədri Nuşirəvan Məhərrəmov deyib ki, Azərbaycan üçün çox mühüm ictimai-siyasi hadisə olan prezident seçkilərinin yüksək peşəkarlıqla keçirilməsində həm dövlət qurumlarının, həm də vətəndaş cəmiyyətinin üzərinə böyük iş düşür. Bu işdə ön sırada media nümayəndələri dururlar. Seçki prosesində kütləvi informasiya vasitələri məsuliyyətli vəzifə daşıyırlar. Cəmiyyətin düzgün istiqamətə yönləndirilməsində media böyük rol oynanır. Ölkəmizdə medianın fəaliyyəti üçün normal mexanizmlər müəyyənləşib. Seçki qanunvericiliyi bizdən öz işimizdə məsuliyyətli olmağı tələb edir. KİV hər seçkidən-seçkiyə yüksək peşəkarlıq nümayiş etdirir. Bunun üçün əsaslar var. Telekanallar seçkilərin işıqlandırılması ilə bağlı kifayət qədər təcrübə əldə edib. Milli Televiziya və Radio Şurasına indiyə qədər hər hansı qurum və namizəd tərəfindən şikayət ünvanlanmayıb. Nuşirəvan Məhərrəmov qeyd edib ki, hazırda bizi ən çox maraqlandıran məsələ bütün televiziya və radio kanallarının fəaliyyətinin seçki qanunvericiliyinə uyğunlaşdırılmasıdır. Ödənişli təşviqata bütün radio və televiziyalar hazırdır. Seçki təşviqatı ilə reklam fəaliyyəti arasında balans gözlənilməlidir. Azərbaycanda başqa ölkələrdən fərqli olaraq televiziyalarda mal və xidmətlərin reklamı namizədlər üçün ayrılan vaxtın qiymətindən baha olur. Bu səbəbdən telekanallar bəzən namizədlər üçün pullu efir vaxtının ayrılmasında maraqlı olmurlar. Televiziya və radio kanallarının namizədlər üçün pullu efir vaxtı ilə bağlı ödəniş məsələsinə normal yanaşılmalıdır. Mətbuat Şurasının sədri, Milli Məclisin deputatı Əflatun Amaşov Şuranın seçki ilə bağlı fəaliyyətindən danışıb. O deyib ki, Mətbuat Şurası hazırda 7 televiziya kanalının, 15 qəzetin, 10 informasiya agentliyinin və xəbər portalının monitorinqini aparır. Beynəlxalq təşkilatların müəyyənləşdirdiyi prinsip və qaydalar əsasında aparılan monitorinqlər zamanı namizədlərlə bağlı materialların nə dərəcədə peşəkarlıqla hazırlanması araşdırılacaq. Bu zaman faktla müəllifin şərhi arasındakı fərqə də diqqət yetiriləcək. Səsvermə günü Mətbuat Şurasının telefonları “qaynar xətt” kimi fəaliyyət göstərəcək. Mətbuat Şurasının İdarə Heyətinin üzvləri də müşahidəçi qismində paytaxtda və bölgələrdə olacaqlar, seçkilərin gedişini işıqlandırmaq üçün jurnalistlərə yaradılan şərait nəzərdən keçiriləcək. Hər hansı məsələ ortaya çıxan zaman Mərkəzi Seçki Komissiyası ilə əlaqə yaradılacaq. Əminik ki, media nümayəndələri əvvəlki seçkilərdə olduğu kimi, 11 aprel prezident seçkilərini də obyektiv, dəqiq və qərəzsiz işıqlandıracaqlar. Sonra Mərkəzi Seçki Komissiyasının sədr müavini Natiq Məmmədovun “Azərbaycan Respublikası Prezidenti seçkilərində seçkiqabağı təşviqat mərhələsində təşviqat subyektlərinin azad davranışı və bərabərliyi. Bu prosesdə KİV-lərin rol və vəzifələri” mövzusunda məruzəsi dinlənilib. Daha sonra məruzə ətrafında fikir mübadiləsi aparılıb və sual doğuran məsələlər müzakirə olunub.
 
Prezident İlham Əliyev Novruz bayramı münasibətilə ümumxalq şənliyində iştirak edib
Bakı, 19 mart, AZƏRTAC Martın 19-da Bakıda Azərbaycan xalqının milli bayramı - Novruz münasibətilə ümumxalq şənliyi keçirilib. AZƏRTAC xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva Novruz şənliyində iştirak ediblər. Dövlətimizin başçısı və xanımı əvvəlcə Qız qalasının qarşısındakı meydana gəldilər. Milli geyimli uşaqlar meydanda rəqs edirdilər. İncəsənət ustalarının baharı, Azərbaycanı tərənnüm edən mahnılarının sədaları ətrafa yayılır, bayram şənliyinin iştirakçılarında xoş ovqat doğururdu. Bahar qız dövlətimizin başçısına səməni təqdim etdi. İçərişəhərin qala divarları üstündə və meydanda qədim tariximizi xatırladan qılınc və qalxanlı döyüşçülər dayanmışdılar. Ulu Dədə Qorqud xeyir-dua verərək, Novruz bayramının xalqımıza ruzi-bərəkət gətirməsini arzuladı. Prezident İlham Əliyev Novruz tonqalını alovlandırdı. Dövlətimizin başçısı bayram şənliyində nitq söylədi. Sonra Azərbaycan Prezidenti İlham Əliyev və xanımı Mehriban Əliyeva Dənizkənarı Milli Parka gəldilər. Dövlətimizin başçısını və xanımını Novruz bayramının əsas personajları olan Kosa və Keçəl qarşıladılar. Kosa və Keçəl Prezidenti və xanımını bayram münasibətilə təbrik etdilər, dövlətimizin başçısı ilə yumurta döyüşdürdülər. Prezident İlham Əliyev və birinci xanım Mehriban Əliyeva bayram konsertinə baxdılar. Dövlətimizin başçısı və xanımı “Novruz” yarmarkası ilə tanış oldular.
 
VI Qlobal Bakı Forumu çərçivəsində Beynəlxalq Kitab Sammiti keçirilib
Bakı, 18 mart, AZƏRTAC Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin (NGBM) təşkilatçılığı ilə keçirilən VI Qlobal Bakı Forumu çərçivəsində martın 18-də 7-ci Beynəlxalq Kitab Sammiti təşkil olunub. AZƏRTAC xəbər verir ki, milli inkişafda, mədəni irsin qorunmasında və gələcək nəsillərə ötürülməsində, gələcəyin formalaşmasında kitabın əhəmiyyəti, eləcə də milli kitabxanaların rolu, kitabxanaların gələcəyi mövzusuna həsr olunan Sammitin açılış sessiyası Nizami Gəncəvi Beynəlxalq Mərkəzinin həmsədri İsmayıl Seragəldinin moderatorluğu ilə keçib. Sessiyada çıxış edən Latviyanın sabiq Prezidenti Vayra Vike-Frayberqa yazılı nitqin yaranmasından, kitab çapının tarixindən danışıb. Rumıniya ilə Azərbaycanın Milli kitabxanaları arasındakı əməkdaşlıqdan bəhs edən Rumıniya Baş nazirinin müavini Ana Birçall tezliklə ölkəsində Azərbaycan Mərkəzinin açılacağını bildirib. O, həmçinin gənclərə kitab sevgisinin aşılanmasının vacibliyini vurğulayıb. Xorvatiyanın sabiq Prezidenti İvo Yosipoviç elektron kitabların müasir insanların həyatındakı rolundan bəhs edib. O, gəncliyində kitaba olan münasibəti indiki dövrlə müqayisə edib, eyni zamanda, kitabxanaların müasir standartlara cavab verməsinin vacibliyini vurğulayıb. Latviyanın sabiq Prezidenti Valdes Zatlers ölkəsinin kitab, bilik təcrübəsinin tarixindən danışıb. Sovet dövründə kitab senzurasından və müəyyən kitabları müzakirə etməyin çətinliyindən bəhs edən keçmiş prezident ölkəsində uşaqlar və gənclər arasında kitaboxuma ənənəsinin olduğunu bildirib. Makedoniya Respublikasının Prezidenti George İvanov ideyalar, fikirlərlə kitabların yaxın əlaqəsindən danışıb. Tarixin müəyyən dövrlərində kitabların yandırılması faktına toxunan Prezident bildirib ki, kitablar yandırıla bilər, amma ideyalar, fikirlər yox. Kitabxana Assosiasiyaları və İnstitutları Beynəlxalq Federasiyasının sabiq prezidenti İnqrid Parent kitabxanaların rolundan danışıb. O, kitabların insanlara daha sekulyar, daha humanist olmasında kömək etdiyini bildirib. Kitabların məlumat daşıyıcısı olduğunu vurğulayan İ.Parent kitabxanaların problemləri, onların həlli yollarından da bəhs edib. Rumıniyanın sabiq Prezidenti Emil Konstantinesku tarix boyu kitabların məhv edilməsini xatırladaraq, nasistlər, həmçinin sovetlər dövründə kitablara qarşı bu əməllərin həyata keçirildiyini deyib. O, kitabın çox şeyi dəyişmək gücündə olduğunu, nəsillər arasında dialoq yaratdığını vurğulayıb. Beynəlxalq Kitab Sammiti açılış sessiyasından sonra panel müzakirələrlə davam edib. Kitabxana Assosiasiyaları və İnstitutları Beynəlxalq Federasiyasının sabiq prezidenti İnqrid Parentin moderatorluğu ilə “Kitab və mədəni irsimizin qorunması” mövzusunda keçirilən sessiyada Konqres Kitabxanasından Mary Jan Deeb kitabın bəşəriyyətin irsi olduğunu deyib. Konqres Kitabxanasının bu istiqamətdə gördüyü işlərə toxunan Mary Jan Deeb dünyada baş verən müharibələrin kitabxanaların fəaliyyətinə təsirini vurğulayıb. Xüsusilə də İraqdakı müharibə nəticəsində xeyli sayda kitabxananın zərər çəkdiyini bildirib. O, həmçinin təbii fəlakətlərin kitabxanalar üçün acı nəticələrindən danışıb. Natiq müasir kitabxanaların hazırkı problemlərinə toxunub, kitabxanaların bərpası və tikintisinin əhəmiyyətini vurğulayıb. Mary Jan Deeb Əfqanıstandakı kitabxanaların vəziyyətinin yaxşılaşdırılması və lazımi avadanlıqlarla təchiz edilməsi istiqamətində Konqres Kitabxanasının həyata keçirdiyi işləri qeyd edib, bütün ölkələrdəki kitabxanaların qorunub saxlanılmasına dəstək göstərdiklərini bildirib. İnternet arxivinin təsisçisi Briyuster Kahle rəqəmsal kitabxana materiallarının toplanması və qorunub saxlanılması üçün gördükləri işlərdən bəhs edib. B.Kahle dünya kitabxanalarındakı kitabların hamısının tamamilə rəqəmsallaşdırılmadığı üçün həmin kitabxanalara girişin olmamasının hələ də əsas problemlərdən olduğunu bildirib. O, rəqəmsal oxucularla işləməyin vacibliyini, müəllif hüquqları məsələsinin nəzarətdə saxlanılmalı olduğunu deyib. Dünya Bankının keçmiş baş məsləhətçisi Nadere Çamlo dahi Azərbaycan şairi Nizami Gəncəvinin fikirlərinə əsaslanaraq deyib ki, bilik hər kəsə açıq olmalıdır. Cəmiyyətin əsas iştirakçısı olan qadınların təhsil almaları və kitabların ötürülməsindəki rolundan danışıb. Nadere Çamlo ümid etdiyini bildirib ki, gələcəkdə qadınlar daha çox kitab oxuyacaq, tərcümə edəcək və onları gələcək nəsillərə ötürəcəklər. Qeyd edək ki, Beynəlxalq Kitab Sammitinin məqsədi milli-mədəni kimliyin və insan sivilizasiyasının qorunmasında kitabın və kitabxanaların rolunu vurğulamaqdır. Sammit ABŞ Konqres Kitabxanası və Misirin İsgəndəriyyə Kitabxanasının birgə təşəbbüsü ilə 2012-ci ildən keçirilir. İsmayıl Seragəldinin təşəbbüsü ilə I Beynəlxalq Kitab Sammitində Azərbaycanı Nizami Gəncəvi Beynəlxalq Mərkəzi təmsil edib. Sammit Vaşinqton (2012), Sinqapur (2013), Paris (2014), İsgəndəriyyə (2015) kimi dünya mədəniyyətinə qlobal təsiri olan şəhərlərdə təşkil edilib.
 
Prezident İlham Əliyev OPEC-in baş katibi ilə görüşüb
Bakı, 18 mart, AZƏRTAC Azərbaycan Respublikasının Prezidenti İlham Əliyev martın 18-də Neft İxrac edən Ölkələr Təşkilatının (OPEC) baş katibi Məhəmməd Barkindo ilə görüşüb. AZƏRTAC xəbər verir ki, OPEC-in baş katibi Məhəmməd Barkindo səfərə dəvətə görə minnətdarlığını bildirdi və Azərbaycan Respublikasının Prezidenti ilə görüşündən məmnunluğunu ifadə etdi. Prezident İlham Əliyev Məhəmməd Barkindo ilə Davosda görüşünü məmnunluqla xatırlayaraq qeyd etdi ki, OPEC-in baş katibinin dünyada ilk dəfə neftin hasil olunduğu Azərbaycana səfəri böyük önəm daşıyır. Məhəmməd Barkindo xoş sözlərə görə minnətdarlığını bildirərək Azərbaycanın neft sənayesinin beşiyi olduğunu vurğuladı və dedi ki, hər bir neftçi gəlib öz gözləri ilə Bakını görməlidir. Dövlətimizin başçısı İlham Əliyev Məhəmməd Barkindonun səfərinin Azərbaycanın tarixi yerləri və müasir inkişafı ilə tanış olmaq üçün yaxşı imkan yaratdığını dedi. Prezident İlham Əliyev Azərbaycan ilə OPEC arasında əməkdaşlığın uğurla inkişaf etdiyini bildirdi və ölkəmizin hasilatla bağlı üzərinə düşən öhdəlikləri tam şəkildə yerinə yetirdiyini vurğuladı. Dövlətimizin başçısı neftin qiymətinin sabit saxlanması istiqamətində Məhəmməd Barkindonun və OPEC-in səmərəli, həmçinin koordinə edilmiş səylərini yüksək qiymətləndirdi, bunu, eyni zamanda, birgə fəaliyyətin yaxşı nəticəsi kimi dəyərləndirdi. Məhəmməd Barkindo OPEC və qeyri-OPEC üzvlərinin bir araya gəlməsində Prezident İlham Əliyevin rolunu xüsusi qeyd etdi, Azərbaycanın OPEC və qeyri-OPEC üzvlərinin əməkdaşlığı üzrə bəyanatın formalaşmasına gətirib çıxaran yüksək səviyyəli texniki komitəyə həmsədrliyini yüksək qiymətləndirdi. Ölkəmizin üzərinə düşən bütün öhdəlikləri tam şəkildə yerinə yetirdiyini deyən qonaq bunun Azərbaycanın bu razılaşmaya nə dərəcə sadiq qaldığının göstəricisi olduğunu bildirdi. Qeyd etdi ki, bu, təkcə neft hasil edən yox, hətta istehlakçı ölkələrin marağındadır. Bu işin nəticələrini artıq neft sənayesində və dünya bazarlarında görmək mümkündür. Söhbət zamanı əməkdaşlığın perspektivləri ətrafında fikir mübadiləsi aparıldı. Sonda xatirə şəkli çəkildi.
 
<< Başlat < Önceki 1 2 3 4 5 6 7 8 9 10 Sonraki > Son >>

Sayfa 4 > 1733
  TKA 2008