TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
QOŞUNLARIN TƏMAS XƏTTİNDƏ MONİTORİNQ BAŞ TUTMUŞDUR
Müdafiə Nazirliyinin mətbuat xidmətindən AzərTAc-a bildirmişlər ki, ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, dekabrın 16-da Azərbaycanın Xocavənd rayonunun Aşağı Veysəlli kəndi yaxınlığında, qoşunların təmas xəttində keçirilən monitorinq insidentsiz başa çatmışdır. Monitorinqi Azərbaycan tərəfdə ATƏT-in hazırkı sədrinin şəxsi nümayəndəsinin səhra köməkçiləri İmre Palatinus, İrji Aberle və Vladimir Çountulov keçirmişlər. Azərbaycanın beynəlxalq səviyyədə tanınan ərazisi ilə təmas xəttinin qarşı tərəfində isə bu işi ATƏT-in fəaliyyətdə olan sədrinin şəxsi nümayəndəsi, səfir Anji Kaspşik, onun səhra köməkçiləri Piter Ki və Antal Herdiç yerinə yetirmişlər.
 
AZƏRBAYCANIN DÜNYA TİCARƏT TƏŞKİLATINA ÜZV OLMASI ÜZRƏ İŞÇİ QRUPUNUN 6-CI İCLASI KEÇİRİLMİŞDİR

Xarici İşlər Nazirliyinin mətbuat xidmətindən AzərTAc-a bildirmişlər ki, Cenevrədə Azərbaycanın Dünya Ticarət Təşkilatına (DTT) üzv olması üzrə işçi qrupunun 6-cı iclası keçirilmişdir.
İclasda Azərbaycanın DTT-yə üzv olmasına hazırlıq işləri üzrə Komissiya sədrinin müavini, xarici işlər nazirinin müavini Mahmud Məmmədquliyevin başçılığı ilə nümayəndə heyəti, Azərbaycan Respublikasının BMT-nin Cenevrə şəhərindəki bölməsi və digər beynəlxalq təşkilatlar yanında daimi nümayəndəsi səfir Elçin Əmirbəyov, İqtisadi İnkişaf Nazirliyinin Xarici Ticarət Siyasəti və DTT şöbəsinin müdiri Ədalət Muradov, digər dövlət qurumlarının təmsilçiləri iştirak etmişlər.
Mallar və xidmətlər üzrə ikitərəfli danışıqların mövcud vəziyyəti müzakirə olunmuş, xarici ticarət rejiminə dair suallar cavablandırılmış, faktlar icmalı ilə bağlı DTT-yə üzv olan ölkələr tərəfindən şərhlər verilmiş, Azərbaycanda DTT-yə dair qanunvericiliyin həyata keçirilməsi ilə bağlı mövcud vəziyyətə diqqət yetirilmişdir.
Ölkəmizin nümayəndə heyətinin rəhbəri çıxış edərək Azərbaycan hökumətinin son dövrdə qeyri-neft sektorunun inkişafına və ümumiyyətlə ölkə iqtisadiyyatının şaxələndirilməsi məsələsinə mühüm diqqət yetirdiyini vurğulamış, bu istiqamətdə görülən işlər barədə məlumat vermişdir. Qeyd edilmişdir ki, açıq dənizə çıxışı olmayan inkişaf etməkdə olan ölkə kimi Azərbaycan sosial-iqtisadi inkişafını təmin etmək üçün əlverişli şərtlərlə çoxtərəfli ticarət sisteminə inteqrasiya etməyi qarşısına məqsəd qoymuşdur. Qısa müddət ərzində mallar və xidmətlər üzrə təkmilləşdirilmiş təkliflər və digər sənədlər hazırlanaraq DTT katibliyinə və əlaqədar ölkələrə təqdim olunmuş, onların əsasında növbəti ikitərəfli danışıqlar keçirilmişdir. Bununla yanaşı, Azərbaycanın milli qanunvericiliyinin DTT-nin sazişlərinə uyğunlaşdırılması sahəsində ölkədə görülən və gələcəkdə görüləcək işlərlə bağlı üzv ölkələrə məlumat verilmişdir. M.Məmmədquliyev Azərbaycanın DTT-yə üzv olması ilə əlaqədar indiyədək görülən işləri özündə əks etdirən hesabat layihəsinin hazırlanmasını təklif etmişdir.
İclasda iştirak edən bir sıra ölkələrin nümayəndələri Azərbaycanın DTT-yə üzvlüyünü dəstəkləmiş, respublikamız tərəfindən bu istiqamətdə həyata keçirilmiş tədbirləri və onların nəticələrini müsbət qiymətləndirmişlər. Braziliya, Hindistan və Paraqvay Azərbaycanın DTT-yə açıq dənizə çıxışı olmayan inkişaf etməkdə olan ölkə kimi üzv olmasını dəstəklədiklərini vurğulamışlar. Bundan sonra ABŞ, Avropa Komissiyası, Kanada və digər ölkələr tərəfindən verilmiş suallar nümayəndə heyətimizin üzvləri tərəfindən cavablandırılmışdır.
İşçi qrupunun sədri hesabat layihəsinə dair təşəbbüslə əlaqədar üzv ölkələrdən bu layihənin hazırlanması məsələsinə baxılmasını, kənd təsərrüfatı sahəsində çoxtərəfli danışıqlarla bağlı üzv ölkələrdən Azərbaycanın təqdim etdiyi müvafiq cədvələ dair yazılı rəylərin təqdim olunmasını, Azərbaycanın xarici ticarət rejiminə dair müvafiq sualların 2009-cu il yanvarın 23-dək təqdim olunmasını xahiş etmişdir. Eyni zamanda, təklif edilmişdir ki, 2009-cu ilin birinci yarısında işçi qrupunun növbəti iclasının keçirilməsi məsələsinin mümkünlüyünə baxılsın.
İşçi qrupunun iclası ilə yanaşı, Azərbaycan bazarında marağı olan, mallar və xidmətlər üzrə müvafiq sorğu təqdim etmiş ABŞ, Avropa Komissiyası, Braziliya, Yaponiya, Şri-Lanka, Çinin Tayvan əyaləti, Kanada, Koreya Respublikası, Norveç, Hindistan və Ekvador ilə ikitərəfli danışıqlar aparılmışdır.
DTT, habelə BMT-nin Ticarət və İnkişaf üzrə Konfransının (UNCTAD) yüksək vəzifəli şəxsləri, o cümlədən mütəxəssisləri ilə işçi qrupunun indiyədək keçirilmiş iclaslarının nəticələrinə dair hazırlanmış Faktlar İcmalının layihəsi, DTT-yə əlverişli şərtlərlə üzvlüyün təmin edilməsində ölkəmizin mövqeyi, digər məsələlər müzakirə olunmuşdur.
Belarus və İraqın müvafiq qruplarının üzvləri ilə görüş keçirilmiş, fikir mübadiləsi, Ukrayna və Çin nümayəndələri ilə məsləhətləşmələr aparılmışdır.

 
AZƏRBAYCAN ALİMİ ABŞ-DA NƏŞR OLUNAN JURNALA RƏYÇİ SEÇİLMİŞDİR

AzərTAc xəbər verir ki, Azərbaycan Milli Elmlər Akademiyasının İnformasiya Texnologiyaları İnstitutunun (İTİ) şöbə müdiri, fizika-riyaziyyat elmləri namizədi Ramiz Alıquliyev ABŞ-da nəşr olunan "İEFE Bilik və İnformasiya Mühəndisliyi Xəbərləri" (İEFE TKDE) jurnalının rəyçisi seçilmişdir. Redaksiya şurası bu qərarı azərbaycanlı alimin nüfuzlu beynəlxalq elmi jurnal və konfranslarda çap edilən əsərlərinə görə vermişdir.
İEFE TKDE elm sahəsində dünyanın aparıcı təşkilatlarından olan Elektrotexnika və Elektron Mühəndisliyi İnstitutu (İEFE) tərəfindən buraxılır və informasiya mühəndisliyi sahəsində dünyada beş ən nüfuzlu jurnaldan biridir.

 

 
GƏLƏN İL AVROPADA GƏNCLƏRİN İŞTİRAKI İLƏ SÜLH VƏ İNKİŞAF ŞƏBƏKƏSİ YARADILACAQDIR

AzərTAc xəbər verir ki, Gənclər üçün Təhsil Mərkəzinin 5 nəfərlik nümayəndə heyəti dekabrın 5-dən 15-dək Gürcüstanın Bakuriani şəhərində təşkil edilən "Sülh və inkişaf" mövzusunda beynəlxalq seminarda iştirak etmişdir.
Avropa İttifaqının Gənclər Proqramının təşkilatçılığı ilə keçirilmiş tədbirin əsas məqsədi Avropanın müxtəlif ölkələrindən olan gənclər təşkilatlarını bir araya gətirmək, onların sülh və demokratiya quruculuğu sahəsində fəal iştiraka təşviq etmək olmuşdur.
Seminarın sonunda Avropanın bir sıra gənclər təşkilatlarının ümumi razılığı ilə Avropa Qeyri-Hökumət Təşkilatlarının sülh və inkişaf şəbəkəsi yaradılacaqdır.
Azərbaycan nümayəndə heyəti tədbirin bir gününü "Azərbaycan günü" elan edərək iştirakçıları ölkəmizin tarixi, mədəniyyəti, musiqisi və mətbəxi ilə yaxından tanış etmişdir. Qonaqlara ölkəmizlə bağlı zəngin ədəbiyyat da təqdim edilmişdir.

 

 
GÖRKƏMLİ TARİXÇİ VƏ ŞƏRQŞÜNAS ERİX FAYQLIN İPƏK YOLU ODLAR YURDUNDAN KEÇƏRƏK - AZƏRBAYCAN TARİXİ KİTABI AVSTRİYADA NƏŞR OLUNMUŞDUR

AzərTAc-ın xüsusi müxbiri xəbər verir ki, avstriyalı tarixçi, görkəmli şərqşünas, professor Erix Fayqlın (1931-2007) "İpək Yolu Odlar Yurdundan keçərək - Azərbaycan tarixi" kitabı Avstriyada alman dilində işıq üzü görmüşdür.
Nüfuzlu "Amalthea" nəşriyyatında nəfis tərtibatda hazırlanmış kitabda mərhum alimin ömrünün son illərində Azərbaycan tarixi ilə bağlı apardığı araşdırmalar öz əksini tapmışdır.
Kitab professor Erik Fayqlın yaxın dostu, yazıçı-alim, publisist, professor Adolf Opel tərəfindən üzərində tamamlama işləri aparılaraq nəşr edilmişdir.
1995-ci ildən etibarən Azərbaycana mütəmadi tədqiqat səfərləri edən, qaçqın düşərgələri və cəbhə xəttində vəziyyətlə yaxından tanış olan, müxtəlif ölkələrdə mövzu ilə bağlı araşdırmalar aparan E.Fayql kitabda arxiv sənədləri və fotomateraillara da geniş yer vermişdir.
Azərbaycan tarixinin ən mühüm dövrlərini özündə əks etdirən əsərin əsas fəsli Dağlıq Qarabağ münaqişəsinə həsr olunmuşdur. Fəsildə ən qədim dövrlərdən xanlıqlar dövrünədək Qarabağın tarixi, ermənilərin ilk dəfə bu ərazilərə kütləvi şəkildə köçürülməsi, bədnam "Böyük Ermənistan" xülyasının kökləri, müxtəlif terrorçu təşkilatların sayəsində erməni millətçilərinin bu istiqamətdə apardığı fəaliyyət, XX əsrin müxtəlif zaman kəsiklərində Azərbaycan xalqına qarşı törətdikləri soyqırımları və torpaqların qəsb edilməsi tarixi faktlar əsasında təsvir edilir. Eyni zamanda, Ermənistan-Azərbaycan, Dağlıq Qarabağ münaqişəsi ötən əsrin 90-cı illərindən 2006-cı ilədək, müfəssəl xronoloji ardıcıllıq gözlənilməklə, oxucuların diqqətinə çatdırılır. Kitabda, həmçinin Azərbaycanın beynəlxalq təşkilatlar çərçivəsində münaqişənin sülh yolu ilə həllinə çalışması qeyd edilir.
Kitabın digər fəsillərində Azərbaycan tarixinin əsas məqamları önə çəkilir: Qobustan, Azərbaycan dilinin tarixi, Babək, müasir Azərbaycan, Azərbaycan mədəniyyət tarixi və s. mövzular öz dolğunluğu ilə fərqlənir.
Kitabda son iki onillikdə kiçik postsovet ölkəsindən yerləşdiyi regionun geosiyasi səhnəsində aparıcı rol oynayan dövlətə çevrilmiş Azərbaycanda gedən inkişafdan da geniş söz açılır. Avropa və Asiyanın qovuşduğu nöqtədə yerləşən Azərbaycanın Prezident İlham Əliyevın rəhbərliyi ilə, öz milli mənəvi dəyərlərini unutmadan, Avropanın taleyi ilə sıx bağlı bir gələcəyə doğru inamla irəlilədiyi qeyd edilir.
Avropada Azərbaycan tarixinə dair ilk fundamental əsər olan, tutarlı mənbələrə söykənən və oxunaqlı "İpək Yolu Odlar Yurdundan keçərək - Azərbaycan tarixi" kitabı sayəsində avropalı oxucular Azərbaycan tarixi və həqiqətləri barədə zəngin məlumatlar əldə edə biləcəklər.
Qeyd edək ki, nəşriyyatın payız kataloqunda elan edilən kitab avropalı oxucularda böyük maraq doğurmuş və nəşr olunanadək nəşriyyata yüzlərlə sifariş daxil olmuşdur.

 

 
<< Başlat < Önceki 1731 1732 1733 1734 1735 1736 1737 1738 1739 1740 Sonraki > Son >>

Sayfa 1731 > 1748
  TKA 2008