Kategoriler
Azertac

Rəcəb Tayyib Ərdoğan: Türkiyə Rusiyadan imtina edə bilməz

Bakı, 19 may, AZƏRTAC

Türkiyə Rusiya ilə münasibətlərdən, Rusiya qazından imtina edə bilməz, bu, strateji məsələdir.

AZƏRTAC Anadolu agentliyinə istinadla xəbər verir ki, bu barədə Türkiyə Prezidenti Rəcəb Tayyib Ərdoğan Atatürkü Anma, Gənclik və İdman Bayramı münasibətilə gənclərlə görüşündə bildirib.

“Bizim hər iki tərəflə (Rusiya və Ukrayna – red.) əlaqələrimiz var. Rusiya ilə nüvə enerjisində bir addımımız var. Gələn il “Akkuyu” atom elektrik stansiyasını bitirib, acacağıq. Bu, bizim üçün çox ciddi mənbədir. Hazırda istehlak etdiyimiz qazın 50 faizini Rusiyadan təmin edirik. Bu, strateji önəm daşıyan münasibətlərdir, biz bu münasibətləri kəsib ata bilmərik”, – Rəcəb Tayyib Ərdoğan gənclərlə görüşündəki çıxışında belə deyib.

Türkiyə Prezidenti bildirib ki, onun nə Rusiya lideri, nə də Ukrayna Prezidenti ilə münasibətləri kəsmək niyyəti yoxdur.

“Həm Putinlə, həm də Zelenski ilə telefon diplomatiyasını davam etdirirəm. Xüsusi nümayəndəmi onların yanına göndərdim və göndərirəm. Biz öz siyasətimizi davam etdirəcəyik”, – deyən Rəcəb Tayyib Ərdoğan vurğulayıb ki, “bölgədə bir sabitlik elementi olacaq dövlət varsa bu da Türkiyədir, bunu qorumağa məcburuq”.

Kategoriler
Azertac

Anar Məmmədov: Azərbaycan-Türkiyə birliyi dostluq, qardaşlıq və müttəfiqlik rəmzinə çevrilib

Bakı, 19 may, AZƏRTAC

Prezident İlham Əliyevin Türkiyə Respublikasına səfəri və Rize-Artvin Beynəlxalq Hava Limanının açılışında iştirak etməsi iki qardaş ölkənin əməkdaşlığını yeni mərhələyə çıxaracaq. Türkiyə Prezidenti Rəcəb Tayyib Ərdoğanın doğulduğu Rizedə beynəlxalq hava limanının açılışında Azərbaycan Prezidentinin iştirak etməsi çox əlamətdar hadisədir. Dövlətimizin başçısının bu tədbirə dəvət olunması bir daha dünyaya nümayiş etdirdi ki, Azərbaycan-Türkiyə qardaşlığı sarsılmazdır və böyük geosiyasi və geoiqtisadi potensiala malik bu iki ölkənin əməkdaşlığı regionda sülhün və təhlükəsizliyin təmin edilməsinə, habelə bölgədə iqtisadi inkişafın daha da gücləndirilməsinə yönəlmişdir. Həmçinin bir daha sübut edildi ki, Azərbaycan-Türkiyə birliyi dostluq, qardaşlıq və müttəfiqlik rəmzinə çevrilib, dünyada dil və etnik baxımdan bir-birinə yaxın ölkələrin çox olması fonunda Azərbaycan-Türkiyə birliyi nümunəvi xarakter daşıyır.

Bu fikirləri AZƏRTAC-a açıqlamasında Milli Məclisin deputatı Anar Məmmədov söyləyib.

Türkiyə-Azərbaycan əlaqələrinin ən yüksək zirvədə olduğunu diqqətə çatdıran A.Məmmədov vurğulayıb ki, bu birlik və qardaşlıq iki liderin yorulmaz fəaliyyəti ilə öz zirvəsini yaşayır. “44 günlük Vətən müharibəsi dövründə Türkiyənin Azərbaycana verdiyi siyasi-mənəvi dəstək isə xalqımız tərəfindən ən yüksək qiymətə layiq görüldü. Türkiyə hakimiyyəti, xalqı bütün dünyaya Azərbaycan ilə həmrəy olduqlarını nümayiş etdirdilər. İkinci Qarabağ müharibəsinin hər anını bir qardaş ölkə olaraq Azərbaycanla birgə yaşadı. Qarabağ müharibəsində əldə edilən şanlı Zəfər isə yalnız Azərbaycanın deyil, eləcə də Türkiyə və bütün türk dünyasının tarixi Qələbəsi kimi qiymətləndirildi. Bu tarixi Qələbədən sonra Türkiyə ilə Azərbaycan arasında imzalanan Şuşa Bəyannaməsi isə iki ölkə arasındaki birliyin daha da üst səviyyələrə çatdırılması baxımından mühüm əhəmiyyət kəsb edən sənəddir. Bu sənəd Azərbaycanın müstəqilliyi dövründə iki qardaş ölkə arasında imzalanan, hərbi təhlükəsizlik məsələlərini, onun müxtəlif parametrlərini göstərən ilk rəsmi sənəddir. Məhz bu baxımdan Şuşa Bəyannaməsi tarixi önəm daşıyaraq, regionda yeni geosiyasi və geoiqtisadi münasibətlərin başlanğıcını qoydu”, – deyə deputat qeyd edib.

O bildirib ki, Prezident İlham Əliyev Rizə-Artvin Hava Limanının açılış mərasimində İkinci Qarabağ müharibəsində Zəfərimizi bizim müştərək, ortaq şanlı tariximiz olduğunu qeyd etdi. Dövlətimizin başçısının “Otuzillik işğala son qoyduq və müharibənin ilk günündə hörmətli Prezident, qardaşım Rəcəb Tayyib Ərdoğanın “Azərbaycan yalnız deyil, Türkiyə Azərbaycanın yanındadır” deməsi bir çoxları üçün ciddi mesaj oldu. Bu, bir daha bütün dünyaya Azərbaycan-Türkiyə münasibətlərinin tarixində məzmun və keyfiyyətcə yeni mərhələnin təməlinin qoyulmasını göstərdi.

A.Məmmədov bildirib ki, hazırda dövlətimiz tərəfindən Qarabağda aparılan bərpa-yenidənqurma işlərində Türkiyə yaxından iştirak edir, hər zaman olduğu kimi, Azərbaycanla həmrəyliyini nümayiş etdirir. Türkiyə ilə Azərbaycanın apardığı siyasət bölgədə sabitlik və sülhün bərqərar olması, xalqların birgə və rahat yaşamasına xidmət edir.

“Bu gün fəxrlə deyə bilərik ki, Türk xalqının ulu öndəri Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir”, Azərbaycanın ümummilli lideri Heydər Əliyevin “Bir millət, iki dövlət” fəlsəfəsi üzərində qurulan Azərbaycan-Türkiyə münasibətləri özünün ən yüksək səviyyəsinə çatıb”, – deyə Anar Məmmədov vurğulayıb.

Kategoriler
Azertac

Tatarıstanda “Rusiya-İslam dünyası: KazanSammit 2022” forumu açılıb

Moskva, 19 may, AZƏRTAC

Rusiyanın Tatarıstan Respublikasında “Rusiya-İslam dünyası: KazanSammit 2022” XIII Beynəlxalq İqtisadi Sammiti açılıb.

AZƏRTAC xəbər verir ki, tədbirdə dünyanın 63 ölkəsinin, Rusiyanın 52 regionunun nümayəndələri iştirak edirlər. Sammitdə birgə istehlak və halal sənayesi, islam maliyyəsi, tərəfdaşlıq bankçılığı, gənclər siyasəti və digər məsələlər müzakirə olunacaq.

Sammit çərçivəsində “Russia Halal Expo” sərgisi, eləcə də Bulqar dövlətində islamın qəbul edilməsinin 1100 illiyinə həsr olunmuş tədbirlər nəzərdə tutulub.

“Kazan Expo” sərgisində halal məhsullar, o cümlədən qədim Quran nümunələri, bulqarların həyat tərzini əks etdirən eksponatlar nümayiş etdirilir.

“Rusiya-İslam dünyası: KazanSammit” forumu Kazan şəhərində 13-cü dəfə keçirilir. Təşkilatçılar forumun keçirilməsində əsas məqsədin Rusiya ilə İslam dünyası arasında əməkdaşlığın inkişafı olduğunu bildirirlər.

Kategoriler
Azertac

Rəcəb Tayyib Ərdoğan: Ankara Finlandiya və İsveçin NATO-ya üzvlüyünü dəstəkləməyəcək

Bakı, 19 may, AZƏRTAC

Türkiyə Finlandiya və İsveçin NATO-ya qəbul olunmasını dəstəkləmir.

AZƏRTAC Anadolu informasiya agentliyinə istinadla xəbər verir ki, bunu Rəcəb Tayyib Ərdoğan Ankarada gənclərlə görüşü zamanı deyib.

“Dostlarımıza Finlandiya və İsveçin NATO-ya daxil olmasına “yox” deyəcəyimizi bildirdik. Biz bu mövqeyimizi davam etdirəcəyik. Terror təşkilatlarının NATO-da olmasına icazə verməyəcəyik. Bu ölkələr PKK və YPG-nin yuvasına çevrilib”, – deyə Türkiyə Prezidenti qeyd edib.

Bir müddət öncə Finlandiya və İsveçin NATO-dakı səfirləri Klaus Korhonen və Aksel Vernhoff ölkələrinin Şimali Atlantika Blokuna qoşulması üçün alyansın Baş katibi Yens Stoltenberqə rəsmi ərizə təqdim ediblər. Lakin indiki halda Türkiyə onların alyansa daxil olmasının əleyhinədir. Türkiyə Prezidentinin sözlərinə görə, bu ölkələr terrorçuları himayə edir.

NATO-ya yeni üzvün qəbul olunması çoxmərhələli prosesdir. Buna alyansda siyasi qərarlar verən Şimali Atlantika Şurası nəzarət edir. Üzvlüyə dair müraciətə əvvəlcə şurada baxılır, sonra isə müvafiq müqavilə alyansın bütün 30 üzv ölkəsi tərəfindən ratifikasiya olunur.

Kategoriler
Azertac

İtaliyanın Baş naziri Mario Draqi Türkiyəyə səfər edəcək

Roma, 19 may, AZƏRTAC

İtaliyanın Baş naziri Mario Draqi Türkiyəyə səfər edəcək.

AZƏRTAC xəbər verir ki, M.Draqi İtaliya Senatındakı çıxışında iyulun ilk günlərində Ankaraya səfər edəcəyini deyib. Bildirib ki, səfər çərçivəsində iki ölkə arasında əlaqələrin perspektivləri və ikitərəfli münasibətlərin müzakirə olunacağı İtaliya-Türkiyə sammiti keçiriləcək.

Baş nazir vurğulayıb ki, bu, son 10 ildə ilk belə sammitdir.

Kategoriler
Azertac

Türkiyədə Atatürkü Anma, Gənclik və İdman Günü qeyd olunur

Ankara, 19 may, AZƏRTAC

Mayın 19-u Türkiyədə Atatürkü Anma, Gənclik və İdman Günü kimi milli bayram səviyyəsində qeyd olunur. Türkiyədə milli qurtuluş mübarizəsinin başlanması ilə əlaqədar təsis edilən bu bayram münasibətilə ölkədə ümumi tətil elan olunub.

AZƏRTAC xəbər verir ki, Türkiyə Prezidenti Rəcəb Tayyib Ərdoğanın bayram münasibətilə ölkə gənclərinin nümayəndələri və görkəmli gənc idmançılarla görüşü nəzərdə tutulub.

Dövlətimizin başçısı, ali hakimiyyət orqanlarının rəhbərləri, eləcə də siyasi partiya liderləri bayram münasibətilə ölkə ictimaiyyətinə təbrik ünvanlayıblar. Müraciətlərdə ulu öndər Atatürkün tarixi missiyasının əbədiyyətə qədər qəhrəman türk xalqının qəlbində silinməz izlər buraxdığı ifadə olunub.

Gənclik və idman naziri Mehmet Muharrem Kasapoğlunun rəhbərliyi ilə ölkə gənclərini təmsil edən geniş heyət Anıtqəbirə gələrək Türkiyə Respublikasının qurucusu Mustafa Kamal Atatürkün məzarını ziyarət edib.

Anıtqəbir önünə əklil qoyulub, Türkiyənin dövlət himni ifa edilib, xatirə dəftərinə ürək sözləri yazılıb.

Anıtqəbr-muzey kompleksində növbəti dəfə Atatürkə tükənməz sevgi və məhəbbəti ehtiva edən izdiham yaşanır.

Xatırladaq ki, Qazi Mustafa Kamal Paşa silahdaşları ilə birlikdə 1919-cu il mayın 19-da Samsun sahillərinə çıxaraq qədim türk yurdunun qurtuluş mübarizəsinə başlayıb. Bu qurtuluşun başlanğıcı Türkiyə xalqının dövlətçilik tarixinə qızıl hərflərlə yazılan unudulmaz səhifələrdəndir.

Kategoriler
Azertac

Bakıda Azərbaycan-Türkiyə Qeyri-Hökumət Təşkilatlarının Əməkdaşlıq Forumu keçirilir

Bakı, 19 may, AZƏRTAC

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 2022-ci il “Şuşa İli” çərçivəsində ilk dəfə olaraq Azərbaycan–Türkiyə Qeyri-Hökumət Təşkilatlarının Əməkdaşlıq Forumu keçirilir.

AZƏRTAC xəbər verir ki, forumda açılış nitqi ilə çıxış edən Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva Azərbaycan–Türkiyə əlaqələrindən və tədbirin əhəmiyyətindən danışıb. Bildirib ki, belə bir əhəmiyyətli forumun Bakıda keçirilməsi vətəndaş cəmiyyətinin inkişafına böyük təkan verəcək. A.Əliyeva qeyd edib ki, Azərbaycanda vətəndaş cəmiyyətinin inkişafı dövlət siyasətidir və vətəndaş cəmiyyəti üzvlərinin fəaliyyətinin dəstəklənməsi ilə bağlı mühüm işlər görülür, onların inkişafı üçün əlverişli mühit yaradılıb. Bunun nəticəsidir ki, ölkəmizdə qeyri-hökumət təşkilatlarının fəaliyyəti ildən-ilə genişlənir.

Sonra çıxış edən Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev bildirib ki, Azərbaycan müstəqilliyini bərpa etdikdən sonra vətəndaş cəmiyyəti institutları ölkənin iqtisadi, sosial və mədəni həyatında mühüm rol oynayıb. QHT-lərə Dövlət Dəstəyi Agentliyinin yaradılması dövlət ilə QHT-lər arasında əməkdaşlığın inkişafının nümunəsinə çevrilib. Buna görə də dövlət orqanlarının QHT-lərlə yaxından əməkdaşlıq etməsi, qərarların qəbulu və sifarişlərin icrası prosesində onların iştirakına şəraitin yaradılması mühüm əhəmiyyət kəsb edir. Azərbaycan dövləti ölkədə fəaliyyət göstərən vətəndaş cəmiyyəti institutlarının, o cümlədən qeyri-hökumət təşkilatlarının formalaşmasına və inkişafına daim ciddi önəm verir. Hazırda ölkədə ictimai təşkilatların fəaliyyətini tənzimləyən əlverişli hüquqi baza mövcuddur.

Kategoriler
Azertac

Prezident İlham Əliyev Türkiyənin kənd təsərrüfatı və meşəçilik nazirini qəbul edib

Bakı, 19 may, AZƏRTAC

Azərbaycan Respublikasının Prezidenti İlham Əliyev mayın 19-da Türkiyənin kənd təsərrüfatı və meşəçilik naziri Vahid Kirişçinin başçılıq etdiyi nümayəndə heyətini qəbul edib.

AZƏRTAC xəbər verir ki, Vahid Kirişçi Türkiyə Prezidenti Rəcəb Tayyib Ərdoğanın salamlarını dövlətimizin başçısına çatdırdı.

Prezident İlham Əliyev salamlara görə minnətdarlığını bildirdi, onun da salamlarını Türkiyə dövlətinin başçısına çatdırmağı xahiş etdi.

Söhbət zamanı Prezident İlham Əliyevin bir neçə gün əvvəl Türkiyəyə səfəri məmnunluqla xatırlandı və bu səfərin əlaqələrimizin inkişafında rolu qeyd edildi.

Prezident İlham Əliyev Vahid Kirişçini Türkiyənin kənd təsərrüfatı və meşəçilik naziri vəzifəsinə təyin olunması münasibətilə təbrik etdi, ona fəaliyyətində uğurlar arzuladı.

Vahid Kirişçi təbrikə görə minnətdarlığını bildirdi, nazir kimi özünün ilk səfərini qardaş Azərbaycana etdiyini vurğuladı.

Görüşdə ölkələrimiz arasında dostluq və qardaşlıq münasibətlərinin bütün sahələrdə uğurla inkişaf etdiyi bildirildi, əməkdaşlığımızın gündəliyində kənd təsərrüfatının mühüm yer tutduğu qeyd olundu.

Prezident İlham Əliyev ermənilər tərəfindən işğal dövründə ərazilərimizdə kənd təsərrüfatı ilə bağlı hər şeyin dağıdıldığını qeyd etdi və azad olunmuş torpaqlarımızda digər sahələrlə yanaşı, kənd təsərrüfatı ilə də bağlı genişmiqyaslı işlərin planlaşdırıldığını bildirdi. Bu baxımdan işğaldan azad edilmiş ərazilərdə Türkiyə ilə kənd təsərrüfatı sahəsində sıx əməkdaşlıq və birgə fəaliyyətin həyata keçirildiyi məmnunluqla vurğulandı.

Söhbət zamanı Bakıda keçirilən “Caspian Agro 2022” – Beynəlxalq Kənd Təsərrüfatı Sərgisinin əhəmiyyəti və Türkiyənin kənd təsərrüfatı və meşəçilik nazirinin başçılığı ilə nümayəndə heyətinin bu sərgidə iştirakının önəmi qeyd edildi, Türkiyə şirkətlərinin sərgidə geniş təmsil olunduqları bildirildi. Vahid Kirişçinin ölkəmizə səfərinin əməkdaşlığımızın genişləndirilməsinə töhfə verəcəyinə əminlik ifadə olundu.

Kategoriler
Azertac

Türkiyənin kənd təsərrüfatı və meşəçilik naziri ilə gələcək əməkdaşlıq imkanları müzakirə edilib

Bakı, 19 may, AZƏRTAC

Ölkəmizdə işgüzar səfərdə olan Türkiyə Respublikasının kənd təsərrüfatı və meşəçilik naziri Vahid Kirişçi ilə Azərbaycanın ekologiya və təbii sərvətlər naziri Muxtar Babayev arasında görüş olub.

Ekologiya və Təbii Sərvətlər Nazirliyinin mətbuat xidmətindən AZƏRTAC-a bildirilib ki, 15-ci Yubiley Azərbaycan Beynəlxalq Kənd Təsərrüfatı və 27-ci Azərbaycan Beynəlxalq Qida Sənayesi sərgiləri çərçivəsində keçirilən görüşdə meşələrin mühafizəsi, bioloji müxtəlifliyin qorunması, su resurslarının səmərəli idarə olunması, eləcə də iki ölkə arasında gələcək əməkdaşlıq imkanları və qarşılıqlı maraq doğuran digər məsələlər müzakirə olunub.

Kategoriler
Azertac

Azərbaycanın xarici işlər naziri TÜRKSOY-un Baş katibi ilə görüşüb

Bakı, 18 may, AZƏRTAC

Azərbaycanın xarici işlər naziri Ceyhun Bayramov mayın 18-də Beynəlxalq Türk Mədəniyyəti Təşkilatının (TÜRKSOY) Baş katibi Sultan Raev ilə görüşüb.

Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, görüşdə nazir Ceyhun Bayramov Sultan Raevi TÜRKSOY-un Baş katibi seçilməsi münasibətilə təbrik edib. O, Azərbaycanın Beynəlxalq Türk Mədəniyyəti Təşkilatı ilə əməkdaşlığa verdiyi yüksək önəmi vurğulayıb. Nazir Şuşada keçiriləcək konfransda iştirakı çərçivəsində Baş katibin azad edilmiş ərazilərdəki vəziyyət, o cümlədən orada aparılan genişmiqyaslı quruculuq işləri ilə yaxından tanış olmaq imkanının olacağını bildirib.

Baş katib Sultan Raev namizədliyinə verdiyi dəstəyə görə Azərbaycan tərəfinə minnətdarlığını ifadə edib. Təşkilatın rəhbəri qismində fəaliyyətin yüksək məsuliyyət tələb etdiyini söyləyən Baş katib Türk dünyasının mədəniyyətinə xidmət edəcəyini vurğulayıb. TÜRKSOY Daimi Şurasının Bursa şəhərində keçirilən iclasında Şuşanın 2023-cü ildə Türk dünyasının mədəniyyət paytaxtı elan olunduğunu xatırladan Sultan Raev bu xüsusda qarşıdan gələn il ərzində zəngin proqramların təşkil ediləcəyini söyləyib.

Görüşdə tərəflər, həmçinin gələn il TÜRKSOY-un 30 illiyinin qeyd edilməsi, Azərbaycanın təşkilatla fəal əməkdaşlığı, türk xalqlarının ortaq mədəniyyətinin təşviqi istiqamətində işlərin görülməsi və digər qarşılıqlı maraq doğuran mövzular üzrə fikir mübadiləsi aparıblar.