Kategori: Kazinform

НҰР-СҰЛТАН, 26 қараша 2021 (ҚазАқпарат) – Ресейдің «Виктория» ұлттық музыкалық сыйлығына үміткерлердің шорт-парағы жария етілді. Онда Димаш Құдайберген «Жыл әншісі» аталымына кандидаттар қатарына қосылды, деп хабарлайды ҚазАқпарат тілшісі.

Dimashnews.com сайтының мәліметінше, биыл музыкалық сыйлық жеңмпаздарын марапаттау рәсімі 2 желтоқсан күні Мемлекеттік Кремль сарайында өтеді. Биыл «Виктория» сыйлығына үміткерлердің қатары өте көп. Олардың саны 700-ден асып жығылады. Шорт-параққа 13 аталым бойынша ең үзіктер кіріп отыр. «Жыл әншісі» аталымында Димашпен қатар кандидаттар арасында Дима Билан, Леонид Агутин, Jony, Филипп Киркоров бар. Димаш бұл аталымға «Я скучаю по тебе» композициясымен ұсынылған.

Айта кетерлігі, 2019 жылы Димаш «Виктория» сыйлығының «Классикалық музыкада жылдың әншісі» және «Жыл жаңалығы» аталымдарында жеңіске жеткен еді.

«Виктория» сыйлығын ақын, меценат Михаил Гуцериев, композитор, продюсер Игорь Крутой, жазушы, медиа-менеджер Юрий Костиндер ұйымдастырып келеді. Финалға шыққандар «Үздік жыл әні», «Үздік поп әнші», «Үздік хип-хоп орындаушы», «Үздік рок-группа немесе рок әнші», «Жыл композиторы», «Жыл ақыны» секілді 13 номинацияда бақ сынайды. Онда қазіргі заманауи музыканың барлық бағыты қамтылған.

Перевод: Марлан Жиембай

ТҮРКІСТАН, 26 қараша 2021 (ҚазАқпарат) – Бүгін Түркістан қаласында Халықаралық «Қазақ тілі» қоғамының VI құрылтайы басталды. Ауқымды шараға ҚР Мемлекеттік хатшысы Қырымбек Көшербаев, Премьер-Министрдің орынбасары Ералы Тоғжанов, сондай-ақ Білім және ғылым министрі Асхат Аймағамбетов және Парламент депутаттары қатысуда, деп хабарлайды ҚазАқпарат тілшісі.

Түркістан қаласындағы «Фараб» кітапханасында өтіп жатқан құрылтай, сондай-ақ еліміздің барлық өңірінен келген қоғам қайраткерлері мен зиялы қауым өкілдерінің, облыстар мен қала басшылары бастаған делегаттардың басын қосты.

Жиналған қауым алдында Мемлекеттік хатшы Қырымбек Көшербаев баяндама жасап, келелі басқосудың маңыздылығына тоқталды.

Жиында сондай-ақ, Халықаралық «Қазақ тілі» қоғамының жаңа президенті сайланып, ұйымның жаңа Жарғысы қабылданады деп күтілуде. Орталық тексеру алқасының есебі тыңдалып, Орталық кеңесінің жаңа құрамы таныстырылмақ. Бұдан өзге Қоғамның жаңа бағдарламасы мен құрылтай қаулысы қабылданады деп күтілуде. Ұйым жұмысына өз үлестерін қосып жүрген бірқатар азаматтар да марапатталмақ.

Автор: Айнұр Ақбаева

БРЮССЕЛЬ, 26 қараша 2021 (ҚазАқпарат) – ҚР Президенті Қасым-Жомарт Тоқаев Еуропалық кеңес Президенті Шарль Мишельмен келіссөз жүргізді, деп хабарлайды ҚазАқпарат Ақордаға сілтеме жасап.

Қасым-Жомарт Тоқаев пен Шарль Мишель Кеңейтілген серіктестік және ынтымақтастық туралы келісімнің тиімді жүзеге асырылуына баса мән бере отырып, Қазақстан мен ЕуроОдақ арасындағы стратегиялық серіктестіктің қазіргі жағдайы мен перспективаларын жан-жақты талқылады.

Кездесу барысында саяси, сауда-экономикалық, инвестициялық салалар бойынша ықпалдастықты кеңейтуге ерекше назар аударылды. Сонымен қатар коронавирус пандемиясына қарсы күреске, оның ішінде вакциналарды және вакцинация паспорттарын өзара мойындауға қатысты өзекті мәселелер сөз болды.

Бұдан бөлек тараптар халықаралық және өңіраралық күн тәртібін, оның ішінде Ауғанстандағы жағдайды және осы елге гуманитарлық көмек көрсету үшін күш жұмылдыру мәселесін талқылады.

Қасым-Жомарт Тоқаев Шарль Мишельдің Еуропалық кеңес президенті лауазымындағы көшбасшылығын жоғары бағалап, Қазақстанмен ынтымақтастыққа бағытталған ашық әрі конструктивті ұстанымына ризашылық білдірді.

Мемлекет басшысы соңғы 30 жылда Қазақстан мен ЕуроОдақ арасында өзара сенімге, құрметке және ортақ басымдықтарға негізделген берік қатынас орнағанын атап өтті.

Тараптар 29 бағыт бойынша ықпалдастықтың құқықтық негізін қалыптастыратын Кеңейтілген серіктестік және ынтымақтастық туралы келісімді толық іске асырудың маңыздылығын атап өтті. ЕуроОдақтың Орталық Азия бойынша жаңа стратегиясының, сондай-ақ ЕуроОдақ – Орталық Азия бағытындағы белсенді диалогтың тиімді жүзеге асырылу барысына оң баға берілді.

Қасым-Жомарт Тоқаев сауда-экономикалық және инвестициялық байланыстардың қарқынды дамып келе жатқанын айтты. Мемлекет басшысының айтуынша, ЕуроОдақ – Қазақстан экономикасына жалпы 160 миллиард АҚШ доллары көлемінде инвестиция құйған ең ірі инвестор. Ал Қазақстан – ЕуроОдақтың Орталық Азия аймағындағы ең ірі сауда серіктесі. Өзара сауда айналымы 24 миллиард долларға жеткен.

Кездесуде Мемлекет басшысы Орталық Азиядағы су ресурстары мәселесіне тоқталып, аймақтағы мемлекеттердің гидроэнергетика, ирригация және қоршаған ортаны қорғау саласындағы маңызды мүдделерін теңестіруге бағытталған Халықаралық су-энергетикалық консорциум құру қажет екенін атап өтті. Осыған байланысты Президент еуропалық серіктестерді Қазақстанның бастамасын жүзеге асыруға үлес қосуға шақырды.

Сонымен қатар Қазақстан Президенті ЕуроОдақ жүзеге асырып жатқан еуропалық «жасыл келісім» атауымен белгілі жаңа экологиялық даму моделіне тоқталды. Осы ретте Қасым-Жомарт Тоқаев сенімді әрі тұрақты түрде шикізатқа қолжетімділікті, сондай-ақ еліміздің аккумуляторлық құн тізбегіне бірігуін қамтамасыз ету арқылы Еуропалық шикізат альянсымен және Еуропалық аккумуляторлық альянспен арадағы серіктестікті жолға қоюға дайын екенін жеткізді.

Кездесу соңында Мемлекет басшысы Шарль Мишельді Қазақстанға сапармен келуге шақырды.

БРЮССЕЛЬ, 26 қараша 2021 (ҚазАқпарат) – ҚР Президенті Қасым-Жомарт Тоқаев Брюссельге ресми сапары аясында Бельгияның Премьер-Министрі Александр Де Кроомен келіссөз жүргізді, деп хабарлайды ҚазАқпарат Ақордаға сілтеме жасап.

Кездесу барысында тараптар саяси, сауда-экономикалық, инвестициялық және гуманитарлық салалар бойынша Қазақстан мен Бельгия арасындағы қарым-қатынастардың даму перспективаларын жан-жақты қарастырды. Сондай-ақ олар халықаралық және аймақтық күн тәртібіндегі өзекті мәселелер жөнінде пікір алмасып, халықаралық ұйымдар аясындағы өзара іс-қимылдарды талқылады.

Қасым-Жомарт Тоқаев Президент болып сайланғалы Бельгияға алғаш рет ресми сапармен келіп отырғанын айтты.

Мемлекет басшысы Қазақстанның Бельгияны Еуропалық Одақтағы саяси және экономикалық тұрғыдан маңызды серіктес санайтынын жеткізді.

Кездесу барысында тараптар сауда-экономикалық және инвестициялық ынтымақтастықты нығайтуға ерекше назар аударды. Мемлекет басшысының айтуынша, Бельгия – еліміздің экономикасына инвестиция салу жөнінен алтыншы орындағы мемлекет. 2005 жылдан бері Бельгия инвестициясының жалпы мөлшері 9,3 миллиард АҚШ долларына жетті. Пандемияға қарамастан, өзара сауда көлемі 13 пайызға өсіп, 300 миллион доллардан асты. Қазақстанда бельгиялық капиталдың қатысуымен 65 заңды тұлға, филиалдар мен өкілдіктер жұмыс істейді.

Экономикалық байланыстарды жандандыру мақсатымен Сауда-экономикалық ынтымақтастық жөнінде үкіметаралық комиссия құру туралы уағдаластыққа қол жеткізілді.

Сонымен қатар тараптар коронавирус пандемиясына қарсы күрес бойынша ықпалдастық орнату мәселесін қарастырды. Мемлекет басшысы Бельгияның Премьер-Министріне қазақстандық QazVac вакцинасының жасалғаны туралы айтты. Қасым-Жомарт Тоқаев бельгиялық биофармацевтика саласының даму деңгейін жоғары бағалап, QazBioPharm ұлттық холдингі мен жақында құрылған бельгиялық биофармацевтикалық платформа арасында ынтымақтастық орнатуды ұсынды.

Әңгімелесу барысында тараптар Глазгодағы СОР26 саммитінің қорытындылары бойынша климаттың өзгеруіне қатысты мәселелерді талқылап, көміртегі бейтараптығына қол жеткізу үшін ұлттық деңгейде қабылданып жатқан шараларға тоқталды.

Кездесуде қауіпсіздікті қамтамасыз ету, терроризмге, адам саудасы мен заңсыз миграцияға қарсы күрес мәселелері де сөз болды. Қасым-Жомарт Тоқаев Қазақстанның Ауғанстанға гуманитарлық көмек көрсету үшін қабылдап жатқан шаралары туралы айтып берді.

Мемлекет басшысы ЕуроОдақпен аймақтық деңгейдегі байланыстар жөнінде айта келіп, «Қазақстан – ЕуроОдақ» және «Орталық Азия – ЕуроОдақ» форматтары бойынша Бельгиямен тығыз ынтымақтастық орнатуға дайын екенін нақтылады. Осы ретте Қазақстан мен ЕуроОдақ арасындағы Кеңейтілген серіктестік және ынтымақтастық туралы келісімнің, сондай-ақ ЕуроОдақтың Орталық Азия жөніндегі жаңа стратегиясының барлық әлеуетін тиімді пайдаланудың маңыздылығына мән берілді.

Қасым-Жомарт Тоқаев Александр Де Крооға Қазақстанда жүзеге асырылып жатқан ауқымды саяси және экономикалық реформалар туралы мәлімет берді. Бельгия Премьер-Министрі Қазақстанның ЕуроОдақпен ынтымақтастығын жоғары бағалады.

Кездесу соңында Мемлекет басшысы Бельгия Премьер-Министрін Қазақстанға ресми сапармен келуге шақырды. Александр Де Кроо елімізге келуге қызығушылық білдірді.

НҰР-СҰЛТАН, 25 қараша 2021 (ҚазАқпарат) – Бүгін Сенаттың жалпы отырысында «Қазақстан Республикасының Үкіметі мен Тәжікстан Республикасының Үкіметі арасындағы өтеусіз әскери-техникалық көмек көрсету туралы келісімді ратификациялау туралы» Заңы қабылданды, деп хабарлайды ҚазАқпарат тілшісі.

Қазақстан Үкіметі мен Тәжікстан Үкіметі арасындағы өтеусіз әскери-техникалық көмек көрсету туралы келісім 2021 жылғы 17 сәуірде Нұр-Сұлтан қаласында жасалған.

«Келісім тәжік тарапына әскери мүлікті, атап айтқанда, оқ-дәрілерді бір рет беруді көздейді. Қазақстан тарапы әскери мүлікті Жамбыл облысының Отар станциясынан Тәжікстан Республикасының аумағына дейін («Рохати» станциясы, Душанбе қаласы) теміржол көлігімен жеткізуді қамтамасыз етіп, оған байланысты барлық шығысты өзі көтереді», – деді ҚР Қорғаныс министрінің орынбасары Руслан Шпекбаев.

Оның айтуынша, Тәжікстан жағы Қазақстаннан алған әскери мүлікті, оны пайдалану құқығын үшінші тарапқа бермейді.

«Әскери мүлікті Тәжікстанға беру Қазақстанның жауынгерлік әзірлігі мен қоғаныс қабілетіне ықпал етпейтінін атап өту қажет», – деді Р. Шпекбаев.

Мұнымен қоса, бүгін сенаторлар «Қазақстан Республикасының Үкіметі мен Тәжікстан Республикасының Үкіметі арасындағы тәжік-ауған шекарасына іргелес аудандарда қауіпсіздікті қамтамасыз етуде әскери-техникалық жәрдем көрсету туралы келісімді ратификациялау туралы» Заңды қабылдады.

Аталған келісім 2021 жылғы 12 шілдеде Нұр-Сұлтан қаласында жасалды.

«Келісімге сәйкес Тәжікстан тарапы Қазақстаннан берілетін әскери мүлікті тек тәжік-ауған шекарасына іргелес аудандарда қауіпсіздікті қамтамасыз ету мақсатында қолдануға және оларды үшінші тарапқа бермеуге міндеттенеді», – деді Руслан Шпекбаев.

Бұдан бұрын хабарланғандай, бүгін Сенаттың жалпы отырысында «Қазақстан Республикасының Үкіметі мен Қырғыз Республикасының Үкіметі арасындағы өтеусіз әскери-техникалық көмек көрсету туралы келісімді ратификациялау туралы» Заңы қабылданды.

Автор: Руслан Ғаббасов

НҰР-СҰЛТАН, 25 қараша 2021 (ҚазАқпарат) – «Дәулет» теннис орталығында 12 жасқа дейінгілер арасында өтіп жатқан Азия командалық біріншілігінің (ITF Asian 12&Under Team Championships 2021) жартылай финалында Қазақстан мен Өзбекстан командалары сынға түседі, деп хабарлайды ҚазАқпарат тілшісі.

Қазақстан теннис федерациясы мәлім еткеніндей, қазақстандық қыздар да, ұлдар да топтық бәсекеде жартылай финалға бірінші орынмен жолдама алды.

Ұлдар таиландтықтардан жеңіліп қалғаннан кейін Иорданиямен матчқа тастүйін дайындықпен шықты.

Алдымен орталық кортта өнер көрсеткен Мадияр Тағыбеков Шатара Талялмен бәсекеде ойын тізгінін бірден қолына алды. Қарсыласына бір ғана гейм берген Мадияр айқын басымдылық танытты.

Ярослав Пшеничный мен Жабер Амир кездесуінде бірінші сетте қазақстандық теннисші тай-брейкте жеңісті жұлып алды. Екіншісінде Ярослав еш мүмкіндік берген жоқ – 6:0.

Жұптық сында да Я.Пшеничный мен М.Тағыбеков қарсыластарын бет қаратпай ұтты – 6:1, 6:0.

Қыздар арасында қазақстандықтар үндістандықтармен кортқа шықты. Алдымен Эвелина Балаганская Майе Реватхиге есе жіберді – 6:7, 4:6. Дегенмен Ева Корышева Хариташри Векатештен айласын асырып, таразы басын теңестірді – 6:2, 6:4. Соңғы бәсекеде Сабина Шухратова мен Е.Корышева Реватхи мен Векатешті сүріндірді – 6:2, 6:4.

Осылайша өз топтарында үздік шыққан қазақстандық ұлдар мен қыздар финалға шығу үшін Өзбекстан құрамасымен таласатын болды.

Еске сала кетейік, бұдан бұрын қазақстандық қыздардың Азия біріншілігінің жартылай финалына шыққанын, Анна Данилинаның Дубайдағы турнирдің ширек финалына өткенін жазған болатынбыз.

Автор: Елжан Ералы

НҰР-СҰЛТАН, 24 қараша 2021 (ҚазАқпарат) – Қасым-Жомарт Тоқаевқа елорданың әлеуметтік-экономикалық және инфрақұрылымдық дамуы жөнінде есеп берілді, деп хабарлайды Ақорданың баспасөз қызметі.

Президентке әлеуметтік нысандар құрылысының көлемін ұлғайту, газбен қамту, инвестиция тарту, үлескерлік құрылыс нысандарын салуды аяқтау жұмыстары жөнінде баяндалды.

Алтай Көлгіновтің айтуынша, биыл Мемлекет басшысының тапсырмасымен салынған жеңілдікпен берілетін қолжетімді баспаналар, білім беру ошақтары мен басқа да әлеуметтік нысандар саны рекордтық деңгейге жеткен. Мәселен, 2019 жылы 2900 әлеуметтік пәтер салынса, 2021 жылы бұл көрсеткіш 10 мыңға дейін жеткен. 2022 жылы кемінде 10 мың әлеуметтік пәтер салу жоспарланып отыр. Сонымен қатар биыл пайдалануға берілген 15 мектеп 40 мыңға жуық оқушыны қамтуға мүмкіндік берді. Келесі жылы тағы да 16 мектеп салу жоспарланған.

Кездесу барысында Мемлекет басшысына эпидемиологиялық ахуалды тұрақтандыру шаралары және елордада жүргізіліп жатқан вакциналау жұмыстары туралы мәлімет берілді.

Қасым-Жомарт Тоқаев қаланы одан әрі дамыту жөнінде бірқатар тапсырма берді.

НҰР-СҰЛТАН, 2021 жылғы 24 қараша (ҚазАқпарат) – Қасым-Жомарт Тоқаевқа елорданың әлеуметтік-экономикалық және инфрақұрылымдық дамуы жөнінде есеп берілді, деп хабарлайды Ақорданың баспасөз қызметі.

Президентке әлеуметтік нысандар құрылысының көлемін ұлғайту, газбен қамту, инвестиция тарту, үлескерлік құрылыс нысандарын салуды аяқтау жұмыстары жөнінде баяндалды.

Алтай Көлгіновтің айтуынша, биыл Мемлекет басшысының тапсырмасымен салынған жеңілдікпен берілетін қолжетімді баспаналар, білім беру ошақтары мен басқа да әлеуметтік нысандар саны рекордтық деңгейге жеткен. Мәселен, 2019 жылы 2900 әлеуметтік пәтер салынса, 2021 жылы бұл көрсеткіш 10 мыңға дейін жеткен. 2022 жылы кемінде 10 мың әлеуметтік пәтер салу жоспарланып отыр. Сонымен қатар биыл пайдалануға берілген 15 мектеп 40 мыңға жуық оқушыны қамтуға мүмкіндік берді. Келесі жылы тағы да 16 мектеп салу жоспарланған.

Кездесу барысында Мемлекет басшысына эпидемиологиялық ахуалды тұрақтандыру шаралары және елордада жүргізіліп жатқан вакциналау жұмыстары туралы мәлімет берілді.

Қасым-Жомарт Тоқаев қаланы одан әрі дамыту жөнінде бірқатар тапсырма берді.

НҰР-СҰЛТАН, 24 қараша 2021 (ҚазАқпарат) – Қазақстанда Түрікменстанның Мәдени күндері өтеді. Бұл туралы еліміздегі Түрікменстан Республикасының Төтенше және Өкілетті Елшісі Батыр Реджепов мәлім етті, деп хабарлайды ҚазАқпарат тілшісі.

«ҚР Президенті Қасым-Жомарт Тоқаевтың Түрікменстанға мемлекеттік сапары барысында Мемлекеттер басшылары Қазақстанда Түрікменстанның Мәдени күндерін атап өту туралы келісті. Екі ел арасында ауқымды мәдени шараның өткізілмегеніне 3 жылдан асып барады. Ел Президенттерінің ресми кездесуінен кейін өзара байланыс қайта серпін алды. Бүгінде біз Түрікменстанның Мәдени күндерін атап өту мақсатында ҚР Мәдениет және спорт министрлігімен бірлескен жұмыс істеп жатырмыз», – деді Батыр Реджепов.

Елшінің айтуынша, аталған мәдени шараны өткізу келесі жылға жоспарланып отыр.

«Сондай-ақ мәдени шаралардан бөлек, екіжақты сауда-экономикалық қатынас та бір ізге қойылған. Олардың арасында ынтымақтастық туралы достық қатынастар туралы шарт бар. Одан бөлек, Түрікменстан Республикасының Президенті Гурбангулы Бердімұхамедовтың 2017 жылы Қазақстанға жасаған мемлекеттік сапары шеңберінде қол қойылған стратегиялық әріптестік туралы шарт өз күшінде», – дейді ол.

Бұған дейін түрікмен дипломаты аталған елдің бейтараптық саясатына қатысты түсінік беріп өтті.

Айта кетсек, бүгін Нұр-Сұлтан қаласында Қазақстан мен Түрікменстан арасындағы достық қарым-қатынас тақырыбында БАҚ-қа арналған баспасөз мәслихаты өтті.

Автор: Әли Ибраев

НҰР-СҰЛТАН, 24 қараша 2021 (ҚазАқпарат) – Қазақстандағы Түрікменстан Республикасының Төтенше және Өкілетті Елшісі Батыр Реджепов екі ел арасындағы достық қарым-қатынас пен Түрікменстанның бейтараптық саясатына қатысты түсінік берді, деп хабарлайды ҚазАқпарат тілшісі.

«Түрікменстанның бастамасымен 2021 жыл Бейбітшілік және сенім жылы деп жарияланғаны белгілі. Өйткені Түрікменстанның бейтараптығы бітімгершілік, бейбіт сипатқа ие. Біз бүкіл әлемде бейбітшілікті насихаттаймыз», – деді Батыр Реджепов.

Сондай-ақ, елші Қазақстан мен Түрікменстан арасындағы екіжақты ынтымақтастық қарым-қатынасқа тоқталып өтті.

«Орталық Азияда тату көршілік пен достық ахуалын қалыптастыру – Түркіменстанның сыртқы саясатының маңызды аспектісі. Қазақстан Республикасымен достық пен бауырластықтың мызғымас байланысына, қос елдің ортақ көпғасырлық рухани және мәдени қарым-қатынасы негіз бола алады. Қазіргі таңда саяси-экономикалық және сенімді серіктестік негізінде құрылған Түрікмен-Қазақстан диалогы жаңа серпін мен мазмұнға ие. Біздің мемлекеттің өзара ынтымақтастығы жеке мүддені көздемейді. Түрікменстан мен Қазақстан Еуразия кеңістігінде игілікті мақсаттарды жүзеге асыруда екіжақты күш-жігер мен инфрақұрылымды біріктіріп, нәтижесінде ауқымды жобалар іске асып жатыр», – дейді ол.

Дипломаттың айтуынша, екі ел арасындағы бейбіт қарым-қатынастың негізін ҚР Тұңғыш Президенті-Елбасы Нұрсұлтан Назарбаев, ҚР Президенті Қасым-Жомарт Тоқаев және Түрікменстан республикасының Президенті Гурбангулы Бердімұхамедов қалыптастырды.

Айта кетсек, бүгін Нұр-Сұлтан қаласында Қазақстан мен Түрікменстан арасындағы достық қарым-қатынас тақырыбында БАҚ-қа арналған баспасөз мәслихаты өтті.

Автор: Әли Ибраев