Kategoriler
Kabar

Акыркы маалыматтар: 958 адамдан COVID-19 жаңы табылып, 10 бейтап көз жумду

Бишкек, 30.07.21. /Кабар/. Кыргызстанда 30-июлга карата коронавирус дагы 958 адамдан аныкталды. Бул тууралуу Республикалык штаб билдирет.

Маалыматка ылайык, анын ичинде Бишкек шаарында – 574, Ош шаарында – 6, Чүй облусунда – 128, Ош облусунда – 26, Талас облусунда – 13, Нарын облусунда – 24, Ысык-Көл облусунда – 52, Жалал-Абад облусунда – 78, Баткен облусунда – 57 адамдан илдет табылган.

“Ал эми бир суткада 1 миң 485 адам илдеттен сакайды”, – деп айтылат штабдын билдирүүсүндө.

Сутка ичинде COVID-19 илдетинен өлкө боюнча 10 бейтап каза болгон.

Бүгүнкү күндө стационарларда коронавирустан 3 миң 888 бейтап, амбулатордук түрдө 11 миң 483 адам дарыланууда.

Кыргызстанда пандемия башталгандан бери 161 миң 973 адам коронавирус жуктурган. Алардын ичинен 142 миң 984 киши айыгып чыкса, 2 миң 311 адам каза болду.

Kategoriler
Kabar

Кыргызстандын чет мамлекеттердеги өкүлчүлүктөрүнүн ишмердүүлүгү талкууланды

Бишкек, 29.07.21. /Кабар/. Кечээ, 28-июлда КР тышкы иштер министри Руслан Казакбаев Кыргызстандын чет мамлекеттердеги өкүлчүлүктөрүнүн башчылары менен видеоконференция форматында кезектеги жолугушуу өткөрдү. Бул тууралуу КР ТИМдин басма сөз кызматы билдирет.

Жолугушуу дипломатиялык кызмат органдарынын 2021-жылдын биринчи жарым жылдыгындагы ишмердүүлүгүнүн жыйынтыктарын талкуулоого жана 2021-жылдын экинчи жарым жылдыгына карата милдеттерди аныктоого арналды.

Өзүнүн киришүү сөзүндө министр белгилегендей, коронавирус инфекциясынын кийинки толкуну, кризистен кийинки оор жагдай, өлкөдөгү конституциялык реформалар шартында министрлик кризистик кырдаалды жөнгө салуу режиминде өлкөнүн тышкы саясий кызыкчылыктарын илгерилетүү ишин улантуусу зарыл экендиги айдан ачык болуп калды.

Кыргызстандын президенти Садыр Жапаров мырза тарабынан бекитилген 2020-жылдын 15-октябрынан 2021-жылдын 15-февралына чейинки мезгилге карата КР Тышкы иштер министрлигинин Кризиске каршы иш-чаралардын биринчи Планын жана 2021-жылдын 16-февралынан 30-июнга чейинки мезгилге карата Кризиске каршы иш-чаралардын экинчи Планын ишке ашыруу боюнча иштин жыйынтыгын чыгарып, министр Кыргызстандын дипломатиялык кызматынын көпчүлүк органдары жогоруда көрсөтүлгөн Пландын багыттары боюнча коюлган тапшырмаларды, анын ичинде саясий жана экономикалык чараларды, COVID-19 боюнча эпидемиологиялык кырдаалды турукташтыруу боюнча чараларды, чет өлкөлөрдөгү жарандарыбыздын укуктарын жана кызыкчылыктарын коргоо боюнча ж.б. милдеттерди ишке ашыруу үчүн бардык күч-аракеттерин жумшагандыгын баса белгиледи.

Жалпысынан, Кризиске каршы экинчи планды ишке ашыруу максатында 500дөн ашуун иш-чара өткөрүлүп, анын 40ы – жогорку жана эң жогорку деңгээлдеги иш сапарлар, 9у – иш сапар жана чет мамлекеттердин бийик даражалуу чиновниктеринин катышуусунда өткөн иш-чаралар, ошондой эле Кыргызстандын делегацияларынын чет мамлекеттерге болгон 14 визити, анын ичинде 7 жолу КР президентинин денгээлинде, КР тышкы иштер министринин 5 визити, видеоконференция аркылуу 35тен ашуун жолугушуу.

Министр Р.Казакбаев COVID-19 пандемиясынын кесепеттерин жоюу, өлкөгө зарыл болгон каржылык, техникалык жана гуманитардык жардамдарды тартуу, тышкы карыздарды реструктуризациялоого көмөктөшүү жаатында жүргүзүлгөн ишмердикти баса белгиледи.

Жыйынтыгында министр Р.Казакбаев Кыргызстандын президенти Садыр Жапаров тарабынан бекитилген 2021-жылдын 1-июлунан баштап мезгилге карата КР Тышкы иштер министрлигинин Кризиске каршы чаралардын үчүнчү планында белгиленген Кыргызстандын чет мамлекеттердеги өкүлчүлүктөрүнүн негизги милдеттерине токтолуп кетти.

Алсак, чет мамлекеттерде Кыргызстандын кызыкчылыктарын, жарандардын укуктарын коргоо, чет өлкөлөрдөгү регионалдык интеграциялык процесстерди кеңейтүү, стратегиялык өнөктөштүк мамилелерди чыңдоо, союздаш жана дос өлкөлөр, эл аралык уюмдар менен өз ара пайдалуу мамилелерди өнүктүрүү милдеттери.

Министр экономикалык дипломатиянын алкагындагы аракеттерди улантуу, инвестицияларды тартуу жана Кыргызстандын аймактарын өнүктүрүүгө көмөктөшүү зарылдыгына өзгөчө көңүл бурду.

Kategoriler
Kabar

КР делегациясы япониялык компания менен маалыматтык технологиялар жаатында кызматташууну талкуулады

Бишкек, 28.07.21. /Кабар/. 23-июлда КР президентинин администрациясынын жетекчисинин орун басары Адылбек Касымалиев башында турган, курамына КР маданият, маалымат, спорт жана жаштар саясаты министри Кайрат Иманалиев, министрдин орун басары – Жаштар иштери, дене тарбия жана спорт мамлекеттик агенттигинин директору Канат Шабданбаев кирген Кыргызстандын расмий делегациясы Токио-2020 32-Жайкы Олимпиада оюндарынын ачылыш аземине катышты. Бул тууралуу КР ТИМдин басма сөз кызматы билдирет.

Ошол эле күнү маданият, маалымат, спорт жана жаштар саясаты министри Кайрат Иманалиевдин Токиодогу Олимпиада жана Паралимпиада оюндарын өткөрүү боюнча Япониянын министри Тамайо Марукава, ошондой эле Япониянын Билим берүү, маданият, спорт, илим жана технологиялар министри Хагиуда Коити менен эл аралык жана эки тараптуу спорт тармагындагы күн тартиби боюнча өз ара аракеттенүү тууралуу кыска жолугушуулары болуп өттү.

2021-жылдын 26-июлунда кыргыз делегациясынын Япониянын Өкүлдөр палатасынын депутаты, Кыргыз Республикасы менен достук лигасынын лидери Ген Накатани менен жолугушуусу болуп өттү.

Тараптар социалдык-экономикалык жана маданий-гуманитардык чөйрөлөрдөгү эки тараптуу кызматташуунун актуалдуу багыттарын, ошондой эле эки өлкөнүн аймактарынын ортосунда байланыштарды орнотуу жана чыңдоо маселелерин талкуулашты. Мындан тышкары, 2022-жылы Кыргыз Республикасы менен Япониянын ортосунда дипломатиялык мамилелердин түзүлгөндүгүнүн 30 жылдыгын майрамдоого арналган биргелешкен иш-чараларды өткөрүү боюнча пикир алмашуу болду.

Сапардын алкагында, үстүбүздөгү жылдын 27-июлунда КР делегациясы Япониянын “Muroo Systems Co. Ltd” компаниясынын өкүлдөрү менен жолугушуп, анда тараптар маалыматтык технологиялар жаатында кызматташууну өнүктүрүүнүн келечегин талкуулашты.

Жолугушуунун жыйынтыгында япониялык компаниянын Кыргызстанга иш сапарын уюштуруу жана КРнын тиешелүү органдары менен кеңейтилген жолугушуу өткөрүү тууралуу макулдашылды.

Kategoriler
Kabar

КР делегациясы “Россия – Ислам Дүйнөсү” эл аралык экономикалык саммитине катышууда

Бишкек, 28.07.21. /Кабар/. Кыргызстандын президентинин администрациясынын жетекчисинин орун басары Ж.А.Асанкулов башында турган Кыргызстандын делегациясы Татарстан Республикасынын президенти Р.Н.Миннихановдун чакыруусу боюнча 2021-жылдын 28-июлунан 30-июлуна чейин Татарстандын Казань шаарында өтө турган «Россия – Ислам Дүйнөсү» эл аралык экономикалык саммитине катышууда. Бул тууралуу Кыргызстандын Россиядагы элчилигинен билдиришти.

Кыргызстандын делегациясынын курамында – Кыргызстандын Россиядагы элчиси Г.-К.Самат, КР инвестициялар министри А.Шыкмаматов, КР президентинин Ысык-Көл облусундагы ыйгарым укуктуу өкүлү М.Кожоев, ошондой эле банк секторунун жана бизнестин өкүлдөрү бар.

Саммитке катышуунун алкагында Татарстандын президенти Р.Минниханов, Сауд Арабия Королдугунун, Бахрейндин, Бириккен Араб Эмираттарынын, Түркиянын жана Башкортостандын делегацияларынын башчылары менен сүйлөшүүлөрдү жүргүзүүсү пландаштырылууда.

Ошондой эле Татарстандын Соода-өнөр жай палатасынын аймагында Татарстандагы ири бизнестин өкүлдөрү менен ишкер сүйлөшүүлөр күтүлүүдө.

Kategoriler
Kabar

АКШ Кыргызстанда COVID-19га каршы күрөшүү үчүн 1 млн долларлык меджабдууларды берди

Бишкек, 28.07.21. /Кабар/. АКШнын Эл аралык өнүктүрүү агенттиги (USAID) Бишкек, Чүй жана Ош облустарындагы беш ооруканага жана үч үй-бүлөлүк медицина борборуна медициналык жабдууларды тапшырды. Бул тууралуу АКШнын Кыргызстандагы элчилигинин басма сөз кызматы билдирет.

Маалыматка ылайык, меджабдуулардын арасында кычкылтек концентраторлору, мобилдик рентген аппараттары, тоңдургучтар жана башка жабдуулар орнотулуп, негизги “кызыл зоналардагы” COVID-19 бейтаптарын диагностикалоо жана дарылоо үчүн колдонулат.

Жабдуунун жалпы баасы болжол менен 1,1 миллион АКШ долларын түздү.

Жалпысынан Республикалык жугуштуу оорулар ооруканасы, ССМ Улуттук госпиталы, №1 Бишкек шаардык ооруканасы, Чүй облустук ооруканасы, Ош шаардык клиникалык ооруканасы, Санитардык-эпидемиологиялык көзөмөлдөө департаменти жана үч үй-бүлөлүк медицина борбору дээрлик 500 даана жабдуу жана коштоочу шаймандарды алышты. Алардын арасында ларингоскоптор, мобилдик санарип рентген аппараттары, өтө төмөн температурадагы тоңдургучтар, жогорку көлөмдөгү кычкылтек концентраторлор, автоклавдар, центрифугалар жана башка маанилүү жабдуулар бар.

Улуттук госпиталдын башкы дарыгеринин милдедит аткаруучусу Токтобай Маанаевдин айтымында, айрым жабдуулар, медициналык кызматкерлерге жана бейтаптарга биринчи жолу жеткиликтүү болуп жатат. “Биринчи жолу мобилдик рентген сатылып алынып, орнотулду. Ал оорулууну жылдырбай, палатасынан эле өпкөсүн рентген аркылуу текшерүүгө өбөлгө түзөт”, – деди Токтобай Маанаев.

Бул жабдууларды орнотуу үчүн сегиз медуюм Кыргыз Республикасынын Саламаттыкты сактоо министрлиги жана ооруканалар менен кеңешүү аркылуу, бейтаптардын максималдуу санына жардам көрсөтүү максатында тандалып алынган.

Расмий тапшыруу аземинде USAIDдин Кыргыз Республикасында башчысынын милдетин аткаруучу Кит Симмонс Улуттук госпиталдын дарыгерлерине жана кызматкерлерине талыкпас мээнети үчүн ыраазычылык билдирди. “Биз сизди колдоп, ушул шаймандарды бергенибизге кубанычтабыз, бирок алар сиздин чеберчилигиңиз жана берилгендигиңиз менен гана иштейт”,- деди Кит Симмонс.

2020-жылдын март айында Кыргыз Республикасында COVID-19 пандемиясы башталгандан бери, USAID 4 млн доллардан ашуун колдоо көрсөттү. Бул акча жеке коргонуу каражаттарын сатып алууга, лобораторияларды жаңыртууга, ден-соолукка байланыштуу маалыматтык тутумдарды өркүндөтүүгө жана 4 миңден ашуун медициналык адистерди окутууга жумшалды. USAID ошондой эле COVID-19 жөнүндө мифтерди жана жалган маалыматтарды жокко чыгаруу үчүн маалымат кампанияларын да колдоду.

Kategoriler
Kabar

Улан Ниязбеков Кореянын Кыргызстандагы элчиси менен кызматташтыкты талкуулады

Бишкек, 27.07.21. /Кабар/. Кечээ, 26-июнь күнү КР ички иштер министри, милициянын генерал-майору Улан Ниязбековдун Корея Республикасынын Кыргыстандагы атайын жана ыйгарым укуктуу элчиси Ли Вон Джэ менен расмий жолугушуусу болуп өттү. Бул тууралуу министрликтин басма сөз кызматы билдирет.
Маалыматка ылайык, ички иштер министри элчини кызматка дайындалышы менен жылуу куттуктап, кызматташтыкты өнүктүрүүнүн маанилүүлүгүн белгиледи. «Сизди Кыргыз Республикасынын Ички иштер министрлигинин имаратында тосуп жатканыбызга кубанычтабыз. Сиздин жогорку кызматка – Кореянын Кыргыз Республикасындагы атайын жана ыйгарым укуктуу элчиси болуп дайындалгандыгыңызга байланыштуу чын жүрөктөн куттуктоомду кабыл алыңыз », – деди Улан Ниязбеков.

Тараптар эки тараптуу кызматташуунун абалы жана келечеги жөнүндө пикир алмашышты. Эки мамлекеттин жарандарынын коопсуздугун жана коомдук коопсуздугун камсыз кылуу жаатында Кыргыз Республикасынын жана Корея Республикасынын укук коргоо органдарынын ортосундагы практикалык өз ара аракеттенүүнү жана кызматташтыкты мындан ары чыңдоонун маанилүүлүгүн белгилешти.

«Корей полициясы улуттар аралык кылмыштуулукка, диний экстремизмге, киберкылмыштуулукка жана баңгизаттарынын мыйзамсыз жүгүртүлүшүнө каршы күрөшүүдө мыкты тажрыйбасы бар экендигин өзгөчө белгилегим келет. Биз Кореянын полиция кызматкерлеринин ушул багыттардагы тажрыйбасын тереңдеп изилдөөгө абдан кызыкдарбыз», – деди ИИМ башчысы.

Өз кезегинде, элчи Ли Вон Джэ эки тараптуу мамилелердин динамикалуу өнүгүү тенденциясына оң баа берип, жылуу кабыл алуу үчүн ыраазычылык билдирди жана мындан аркы тыгыз жана жемиштүү кызматташууга ниети бар экендигин кошумчалады.

Министр жолугушууну жыйынтыктап жатып, КР Ички иштер министрлиги Кореянын укук коргоо органдары менен эки тараптуу кызматташууга өзгөчө маани берип, эки тараптын укук коргоо органдарынын ортосундагы ар тараптуу стратегиялык өнөктөштүктү өнүктүрүүгө жана өз ара аракеттенүүнү мындан ары кеңейтүүгө даяр экендигин белгиледи. Жолугушуу жылуу достук маанайда өттү.

Kategoriler
Kabar

Акыркы маалыматтар: 973 адамдан COVID-19 жаңы табылып, 12 бейтап көз жумду

Бишкек, 26.07.21. /Кабар/. Кыргызстанда 26-июлга карата коронавирус дагы 973 адамдан аныкталды. Бул тууралуу коронавируска каршы Республикалык штаб билдирет.

Маалыматка ылайык, анын ичинде Бишкек шаарында – 637, Ош шаарында – 23, Чүй облусунда – 72, Ош облусунда – 12, Талас облусунда – 18, Нарын облусунда – 18, Ысык-Көл облусунда – 39, Жалал-Абад облусунда – 92, Баткен облусунда – 62 адамдан илдет табылган.

“Ал эми бир суткада 1 миң 568 адам илдеттен сакайды, анын ичинде Бишкек шаарында – 1087, Ош шаарында – 46, Чүй облусунда – 148, Ош облусунда – 67, Талас облусунда – 4, Нарын облусунда – 7, Ысык-Көл облусунда – 47, Жалал-Абад облусунда – 74, Баткен облусунда – 88 бейтап айыгып чыкты”, – деп айтылат штабдын билдирүүсүндө.

Сутка ичинде COVID-19 илдетинен Бишкек шаарында 8, Чүй облусунда 4 бейтап каза болгон. Бүгүнкү күндө стационарларда коронавирустан 4 миң 187 бейтап, амбулатордук түрдө 13 миң 691 адам дарыланууда.

Бир сутка ичинде өлкө боюнча 11 медициналык кызматкер коронавирус жуктуруп алганы аныкталды. Стационардан 21, ал эми үй карантининен 27 медкызматкер чыгарылган. Пандемия башталгандан бери 6 миң 354 медицина кызматкери коронавирус жуктуруп алган, алардын ичинен 5 миң 651 медкызматкер айыгып чыкты.

Кыргызстанда пандемия башталгандан бери 158 миң 120 адам коронавирус жуктурган. Алардын ичинен 136 миң 700 киши айыгып чыкса, 2 миң 261 адам каза болду.

Kategoriler
Kabar

Акыркы маалыматтар: 1 147 адамдан COVID-19 жаңы табылып, 11 бейтап көз жумду

Бишкек, 24.07.21. /Кабар/. Кыргызстанда 24-июлга карата коронавирус дагы 1 миң 147 адамдан аныкталды. Бул тууралуу саламаттык сактоо жана социалдык өнүктүрүү министринин орун басары Жалалидин Рахматулаев брифинг учурунда билдирди.

Анын айтымында, Бишкек шаарында – 661, Ош шаарында – 8, Чүй облусунда – 153, Ош облусунда – 59, Талас облусунда – 20, Нарын облусунда – 26, Ысык-Көл облусунда – 52, Жалал-Абад облусунда – 95, Баткен облусунда – 73 адамдан илдет табылган.

“Ал эми бир суткада 1 миң 306 адам илдеттен сакайды, анын ичинде Бишкек шаарында – 811, Ош шаарында – 37, Чүй облусунда – 161, Ош облусунда – 50, Талас облусунда – 14, Нарын облусунда – 14, Ысык-Көл облусунда – 40, Жалал-Абад облусунда – 64, Баткен облусунда – 115 бейтап айыгып чыкты”, – дейт ал.

Сутка ичинде COVID-19 илдетинен Бишкек шаарында 8, Чүй облусунда 1, Жалал-Абад облусунда 2 бейтап каза болгон.

Бүгүнкү күндө стационарларда коронавирустан 4 миң 143 бейтап, амбулатордук түрдө 15 миң 60 адам дарыланууда.

Бир сутка ичинде өлкө боюнча 31 медициналык кызматкер коронавирус жуктуруп алганы аныкталды. Стационардан 17, ал эми үй карантининен 26 медкызматкер чыгарылган. Пандемия башталгандан бери 6 миң 326 медицина кызматкери коронавирус жуктуруп алган, алардын ичинен 5 миң 576 медкызматкер айыгып чыкты.

Кыргызстанда пандемия башталгандан бери 156 миң 152 адам коронавирус жуктурган. Алардын ичинен 133 миң 444 киши айыгып чыкса, 2 миң 238 адам каза болду.

Kategoriler
Kabar

Россиядагы элчи “РусГидро” акционердик коомунун өкүлү менен жолугушту

Бишкек, 23.07.21. /Кабар/. Ушул жылдын 21-июлунда Кыргызстандын Россиядагы элчиси Гүлнара-Клара Самат “РусГидро” ПАОнун инженериңти долбоорлоо жана эл аралык кызматташуу боюнча башкы директорунун орун басары Сергей Мачехин менен жолугушуу өткөрдү.

Элчиликтен билдиришкендей, жолугушуунун негизги максаты – “РусГидро” ПАОнун жана “Гидропроект Институту” АК Кыргызстандагы гидроэнергетикалык долбоорлорду даярдоодо жана жүзөгө ашырууда мындан ары катышуу маселелерин талкуулоо болду.

Тараптар потенциалды жогорулатуу жана электр энергиясын өндүрүү үчүн Кыргызстандын гидроэнергетикалык потенциалын өнүктүрүү зарылдыгы жөнүндө бир пикирге келишти.

Жолугушууда Кыргызстандагы бир катар ГЭСтер жана ГЭС каскаддары боюнча актуалдуу маселелерден тышкары, РусГидро тобу аркылуу кызматташууну өркүндөтүүнүн мүмкүн болгон механизмдери, биргелешкен жумушчу топ түзүү, Россиянын делегацияларынын Кыргызстанга пландаштырылган жолугушуулары жана иш сапарлары талкууланды.

Андан тышкары, Кыргызстандын гидроэнергетикалык адистери Россиянын жогорку окуу жайларынын базасында Россиянын технологиялары боюнча стажировкаларды жана окутууларды уюштуруу мүмкүнчүлктөрү талкууланды.

Россия тарап экологиялык стандарттардын жана талаптардын сакталышын эске алуу менен учурдагы макулдашууларды ишке ашыруунун алкагында биргелешкен жигердүү иш алып барууга даяр экендигин баса белгиледи.

Kategoriler
Kabar

Кыргызстан Кореядагы эл аралык көргөзмөдө өзүнүн продукцияларын көрсөтүүдө

Бишкек, 23.07.21. /Кабар/. 2021-жылдын 22-июлунан 24-июлуна чейин Сеул шаарында “Import Goods Fair 2021” эл аралык көргөзмөсү өтүүдө, анын алкагында Кыргыз Республикасынын Корея Республикасындагы элчилиги Кыргызстандын экспорттук мүмкүнчүлүктөрүн көрсөтүүдө. Бул тууралуу элчиликтин басма сөз кызматы билдирет.

Маалыматка ылайык, КРнын Экономика жана финансы министрлигинин жардамы менен ата мекендик продукциялар: бал (Аман Гринфуд, Bee Honey, Дары Тянь-Шаня, Алай жана Чоң-Алайдын балчылары), шоколад жана нуга (Nag Group), табигый комплекстүү витаминдер жана чөптөрдүн негизинде жасалган эликсирлер (Aronia Farm), кийизден жасалган буюмдар, ошондой эле Түштүк Кореянын HESED компаниясы тарабынан Кыргызстандан келген текстиль буюмдары тартууланды.

Көргөзмөнүн жүрүшүндө конокторго Кыргыз бал, боорсок жана “Чак-чак” сунушталууда.

Мындан тышкары, көргөзмөнүн алкагында Кыргыз Элчилиги мамлекеттин туристтик потенциалы менен тааныштырууда, атап айтканда, Кыргызстан жөнүндө видеофильмдерди көрсөтүп жана туристтик мүмкүнчүлүктөр жөнүндө брошюраларды таратууда.

Маалымат үчүн: Жыл сайын өтүүчү “Import Goods Fair 2021” көргөзмөсү Түштүк Кореяда чет мамлекеттердин товарларын жана продукцияларын илгерилетүү боюнча эң ири эл аралык көргөзмөлөрдүн бири болуп саналат.