Kategoriler
Kabar

Кыргызстан менен Венгриянын Үрөн өстүрүүчүлөр ассоциациялары кызматташат

Бишкек, 19.05.22. /Кабар/. Венгриянын Мартонвашар шаарында Кыргызстан менен Венгриянын Үрөн өстүрүүчүлөр ассоциацияларынын ортосундагы кызматташтык жөнүндө макулдашууга кол коюу аземи болуп өттү. Бул тууралуу КР Тышкы иштер министрлигинин басма сөз кызматы билдирет.

Маалыматка ылайык, макулдашууга кыргыз тараптан Үрөн өстүрүүчүлөр ассоциациясынын президенти Абдухаким Исламов, венгер тараптан Үрөн өстүрүүчүлөр ассоциациясынын президенти Такач Геза кол коюшту.

Кол коюу аземине Венгриянын айыл чарба министри Иштван Надь, Кыргызстандын Венгриядагы элчиси Талантбек Кушчубеков жана ФАО өкүлдөрү катышты.

Министр Иштван Надь өз сөзүндө Венгриянын үрөн өндүрүүчүлөрү айыл чарба өсүмдүктөрүнүн генетикалык модификациясын колдонбой, салттуу селекция аркылуу өсүмдүктөрдүн сортторун жакшыртууну улантып жатканын баса белгиледи. Келишимге кол коюу эки өлкөнүн ортосундагы айыл чарба тармагындагы биргелешкен долбоорлорду ишке ашырууга мүмкүнчүлүктөрдү ачат.

Ошондой эле Кыргызстандын Венгриядагы элчиси Т.Кушчубеков Венгриянын айыл чарба министри И.Надь менен жолугушуп, анда Европа өлкөлөрүнө Кыргызстандын төө буурчактарын, балын жеткирүүнү, Кыргызстанда эт-сүт фермаларын жана айыл чарба продуктуларын кайра иштетүү өндүрүшүн түзүүнү, ошондой эле биргелешкен үрөн чарбаларын уюштуруу мүмкүнчүлүктөрүн талкуулашты.

Kategoriler
Kabar

Кыргызстан кайсы адистерге муктаж? Тизме

Бишкек, 19.05.22. /Кабар/. КР Билим берүү жана илим министрлигинин жогорку жана орто кесиптик билим берүү башкармалыгынын башкы адиси Төөлөсбай Абылкасымов “Биринчи радионун” эфиринде бүгүнкү күндө Кыргызстан кайсы адистерге муктаж экендиги тууралуу айтып берди.

Анын айтымында, КР Эмгек, социалдык камсыздоо жана миграция министрлиги жыл сайын изилдөө жүргүзүп, анын алкагында эмгек рыногунда кадр тартыштыгы бар ишмердүүлүктүн багыттары аныкталат.

Бүгүнкү күндө Кыргызстан IT-адистерине, айыл чарба тармагындагы кызматкерлерге, курулуш тармагындагы кызматкерлерге, медицина кызматкерлерине, мугалимдерге муктаж.

«Бүгүнкү күндө өлкө жетекчилиги жогоруда аталган чөйрөдөгү кызматкерлерге ыңгайлуу иштөө үчүн бардык зарыл шарттарды түзүп жатканын белгилей кетүү керек», – деди ал.

Kategoriler
Kabar

Министр Жээнбек Кулубаев Россиянын элчиси Николай Удовиченкону кабыл алды

Бишкек /Кабар/. Кыргызстандын тышкы иштер министри Жээнбек Кулубаев Россиянын РФдагы элчиси Николай Удовиченкону кабыл алды, – деп кабарлайт КР ТИМдин басма сөз кызматы.

Маалыматка ылайык, жолугушуунун жүрүшүндө кыргыз-россия соода-экономикалык, инвестициялык, маданий-гуманитардык, аймактар аралык кызматташуунун негизги маселелери талкууланды, ошондой эле аталган багыттар боюнча мурда жетишилген макулдашууларды ишке ашыруу маселелери жана Россияда эмгектенген Кыргызстандын жарандарынын актуалдуу көйгөйлөрү каралды.

Кыргыз-россия саясий диалогунун жогорку деңгээлине канааттангандыгын билдирүү менен, министр Ж. Кулубаев Кыргызстан менен Россиянын ортосундагы союздаштык мамилелерди жана стратегиялык өнөктөштүктү ырааттуу бекемдөө максатында бардык артыкчылыктуу багыттар боюнча өз ара пайдалуу кызматташтыкты мындан ары өнүктүрүүнүн маанилүүлүгүн белгиледи.

Тараптар ошондой эле алдыда боло турган тышкы саясий иш-чаралар, анын ичинде 2022-жылдын 26-27-майында Бишкек шаарында өтө турган Жогорку Евразия экономикалык кеңешинин кезектеги жыйыны жана биринчи Евразия экономикалык форуму тууралуу пикир алмашышты.

Kategoriler
Kabar

Кыргызстанда орточо айлык акы дээрлик 21 миң сомду түздү

Бишкек, 18.05.22. /Кабар/. Республика боюнча орточо айлык акы кичи ишканаларды кошпогондо 20 миң 943 сомду түзүп, 11,4%га өстү. Бул тууралуу “Кабар” агенттигиндеги маалымат жыйынында КР экономика жана коммерция министринин биринчи орун басары Чоро Сейитов билдирди.

Анын айтымында, эң жогорку айлык акы саламаттык сактоо, калкты солциалдык жактан тейлөө, пайдалуу кен байлыктарды казуу, транспорттук ишмердүүлүк, кесиптик-илимий ишмердүүлүк жана башка чөйрөлөрдүн кызматкерлерине кошулган.

Kategoriler
Kabar

Аида Касымалиева ЮНИСЕФтин аткаруучу директору Кэтрин Рассел менен жолугушту

Бишкек, 18.05.22. /Кабар/. Кыргызстандын БУУдагы туруктуу өкүлү Аида Касымалиева ЮНИСЕФтин аткаруучу директору Кэтрин Рассел менен жолугушту. Бул тууралуу КР Тышкы иштер министрлигинин басма сөз кызматы билдирет.

Маалыматка ылайык, жолугушуунун жүрүшүндө тараптар Кыргызстан менен БУУнун Балдар фондунун ортосундагы өз ара аракеттенүүнүн актуалдуу маселелерин талкуулашты.

А.Касымалиева Кыргызстан ЮНИСЕФтин ишмердүүлүгүн жогору баалап, аны менен ар тараптуу кызматташууну бекемдөөгө өзгөчө маани берерин баса белгиледи. Мындан тышкары, Кыргызстандын туруктуу өкүлү ЮНИСЕФке эне жана баланын ден соолугун коргоо, балдардын билим берүү кызматтарына жетүүсүнө мүмкүндүк алуу, балдардын өлүмүн кыскартуу, өлкө калкын COVID-19га каршы эмдөө жаатындагы өлкө программаларын ийгиликтүү ишке ашыргандыгы үчүн ыраазычылык билдирди.

Өз кезегинде, ЮНИСЕФтин аткаруучу директору Кэтрин Рассел КР өкмөтүнүн калктын аялуу катмарынын айрым категорияларына, анын ичинде бала кезинен бери ден соолугунун мүмкүнчүлүктөрү чектелүү адамдарды багып келе жаткан жарандарга мамлекеттик колдоону күчөтүү боюнча ишин жогору баалады. ЮНИСЕФтин Кыргызстандагы 2023-2027-жылдарга түзүлгөн өлкө программасын колдоорун билдирди.

Тараптар ошондой эле учурдагы эл аралык кырдаалдын жана азык-түлүк коопсуздугунун калктын социалдык жактан аялуу катмарына, биринчи кезекте балдарга болгон терс кесепеттерин талкуулашты.

Алар Кыргызстандагы балдардын абалын жакшыртууга жана кыргызстандыктардын жаңы муунун тарбиялоого багытталган биргелешкен долбоорлорду ишке ашырууга кызыкдар экендиктерин билдиришти.

Kategoriler
Kabar

Кыргыз-катар кызматташтыгынын транспорт тармагындагы абалы жана келечеги талкууланды

Бишкек, 17.05.22. /Кабар/. Бүгүн, 17-майда Доха шаарында Кыргызстандын Катардагы элчиси Чынгыз Эшимбеков Катардын транспорт министри Жассим Аль-Сулайти менен жолугушуу өткөрдү. Бул тууралуу КР Тышкы иштер министрлигинин басма сөз кызматы билдирет.

Маалыматка ылайык, жолугушууда кыргыз-катар кызматташтыгынын транспорт тармагындагы абалы жана келечеги жөнүндө пикир алмашуу болду. Жарандык авиация тармагында өз ара аракеттенүүнү улантуу маселесине өзгөчө көңүл бурулду.

Жолугушуунун жыйынтыгында талкууланган маселелер боюнча өз ара координациялоо макулдашылды.

Kategoriler
Kabar

Кыргызстан менен Өзбекстандын атайын кызматтарынын башчылары жолукту

Бишкек, 17.05.22. /Кабар/. Бүгүн, 17-майда Кыргызстандын Улуттук коопсуздук мамлекеттик комитетинин төрагасы Камчыбек Ташиев менен Өзбекстандын Мамлекеттик коопсуздук кызматынын төрагасы Абдусалом Азизов жолугушту. Бул тууралуу КР УКМКнын басма сөз кызматы билдирди.

Маалыматка ылайык, эки өлкөнүн атайын кызматынын төрагалары биргеликте Жалал-Абад облусунун Ала-Бука районундагы чек ара тилкесиндеги макулдашыла элек Гавасай участкасын тик учак менен кыдырышты.

Тараптар тийиштүү маселелер боюнча өз ара пикир алмашты. Жолугушуу жылуу достук маанайда өттү жана тиешелүү чечимдер кабыл алынды.

Kategoriler
Kabar Uncategorized

КР элчиси дипломатиялык корпустун Дуайени, Германиядагы Апостолдук нунцийи менен жолукту

Бишкек, 17.05.22 /Кабар/. Кечээ, 16-майда Кыргызстандын Германиядагы элчиси Өмүрбек Текебаев дипломатиялык корпустун Дуайени, Германиядагы Апостолдук нунцийи Никола Этерович менен жолукту. Бул тууралуу КР Тышкы иштер министрлигинин басма сөз кызматы билдирет.

Маалыматка ылайык, Апостолдук нунций элчи Өмүрбек Текебаевди Кыргызстандын Германиядагы элчиси кызматына дайындалгандыгы менен куттуктап, элчинин ишмердүүлүгүнө максималдуу көмөк көрсөтүүгө даяр экендигин билдирди.

Элчи Өмүрбек Текебаев маектешине Кыргызстандагы учурдагы саясий кырдаал, ошондой эле Кыргызстандын экономикалык реформаларды ишке ашырууга багытталган улуттук кызыкчылыктары жана пландары жөнүндө маалымат берди. Элчи Өмүрбек Текебаев Кыргызстандын кызыкчылыктарынын жана умтулууларынын айрым багыттары Ыйык Тактынын (Ватикан) жүргүзүп жаткан саясатына дал келерин белгиледи.

Маектештер Кыргызстан менен Ыйык Тактынын (Ватикан) ортосундагы кызматташтыктын эки тараптуу күн тартибин, ошондой эле региондогу жана жалпы дүйнөдөгү коопсуздук, экология жана башка гуманитардык маселелерди кеңири талкуулашты.

Элчи Өмүрбек Текебаев маектешине кыргыз элинин тарыхы жөнүндө кеңири айтып берип «Роза Отунбаеванын демилгеси» эл аралык коомдук фонду тарабынан немис тилинде чыгарылган «Манас» эпосу тууралуу иллюстрацияланган китебин белекке берди.

Жолугушуунун аягында Апостолдук нунций кызыктуу маек үчүн ыраазычылыгын билдирип, бардык белгиленген пландарды ишке ашырууда ийгиликтерди каалады.

МаалымдамаАпостолдук нунций — Ыйык тактынын (Ватикан) дипломатиялык мамиледе болгон мамлекеттериндеги Рим Папасынын туруктуу дипломатиялык өкүлү.

Kategoriler
Kabar

Президент Садыр Жапаровдун Россияга иш сапары аяктады

Бишкек, 17.05.22. /Кабар/. Кыргызстандын президенти Садыр Жапаровдун 16-майда өткөн Жамааттык коопсуздук келишими уюмуна (ЖККУ) мүчө мамлекеттердин башчыларынын жыйынына катышуу үчүн Россия Федерациясынын борбору Москвага иш сапар аяктады. Бул тууралуу президенттин басма сөз кызматынан билдиришти.

Жамааттык коопсуздук жөнүндө келишимдин 30 жылдыгына жана ЖККУнун 20 жылдыгына арналган ЖККУнун мааракелик жыйынына Россиянын президенти Владимир Путин, Армениянын премьер-министри Никол Пашинян, Беларустун президенти Александр Лукашенко, Казакстандын президенти Касым-Жомарт Токаев жана Тажикстандын президенти Эмомали Рахмон катышты.

Өлкө лидерлери эл аралык жана аймактык коопсуздуктун абалын, ЖККУнун азыркы реалдуулуктагы ролун жана ордун, ошондой эле кризиске каршы аракеттенүү системасын өркүндөтүү маселелерин талкуулашты.

Жыйындын жыйынтыгы боюнча ЖККУ Жамааттык коопсуздук Кеңешинин Жамааттык коопсуздук жөнүндө келишимдин 30 жылдыгына жана Жамааттык коопсуздук келишими уюмунун 20 жылдыгына байланыштуу билдирүүсүнө, ошондой эле

-“ЖККУнун Казакстан Республикасынын аймагында тынчтык орнотуучу операциясынын катышуучуларын ЖККУ сыйлыктары менен сыйлоо жөнүндө” ЖККУ ЖККнын чечимине кол коюлду.

Сыйлангандардын арасында Казакстандагы январь окуясында ЖККУнун контингентинин курамында тынчтыкты сактоо миссиясын аткарган Кыргызстандын бир катар аскер кызматкерлери бар.

Саммит аянтчасында тет-а-тет форматында президент Садыр Жапаров Россиянын президенти Владимир Путин менен жолугушуп, кыргыз-орус эки тараптуу кызматташтыгынын актуалдуу багыттарын талкуулашты.

Иш сапары аяктаган соң, мамлекет башчысы бүгүн, 17-майда, БАЭ президенти Шейх Халифа бин Заид Аль Нахаяндын каза болгондугуна байланыштуу аза күтүү иш-чараларына катышуу үчүн Москвадан Абу-Даби шаарына (Бириккен Араб Эмираттары) багыт алды.

Kategoriler
Kabar

Садыр Жапаров Россиянын президенти Владимир Путин менен жолугушту

Бишкек /Кабар/. Кыргызстандын президенти Садыр Жапаров 16-майда, Россиянын президенти Владимир Путин менен жолугушту. Бул тууралуу президенттин басма сөз кызматы билдирет.

Тет-а-тет форматындагы жолугушууда өлкө лидерлери кыргыз-орус эки тараптуу кызматташтыгынын актуалдуу багыттарын талкуулашты.

Россиянын президенти Владимир Путин тараптар ортосундагы мамилелер жалпысынан позитивдүү өнүгүп жатканын белгиледи.

Ал былтыркы товар жүгүртүүнүн олуттуу өсүшүн белгилеп, Россия Кыргызстандын товар жүгүртүүсүндө ишенимдүү биринчи орунда тураарын кошумчалады.

Владимир Путин ЖККУ саммитинин аянтында биргелешкен өз ара аракеттенүүнүн багыттарын көзмө-көз талкуулоого мүмкүнчүлүк бар экенин канааттануу менен билдирди.

Президент Садыр Жапаров өз кезегинде Владимир Путинге жылуу кабыл алгандыгы үчүн ыраазычылык билдирип, дагы бир жолу Улуу Жеништин 77 жылдыгы жана өлкөлөр ортосундагы дипломатиялык мамилелердин түзүлгөндүгүнүн 30 жылдыгы менен куттуктады.

Садыр Жапаров Россия Федерациясы менен бардык багыттар боюнча эки тараптуу кызматташууга даяр жана кызыкдар экенин билдирди.