Kategoriler
Kabar

Бишкектик волейболчулар Россияда өткөн эл аралык турнирде коло байгеге ээ болду

Бишкек, 30.09.22. /Кабар/. Р.Санатбаев атындагы олимпиадалык резервдеги адистештирилген балдар-өспүрүмдөр мектебинин тарбиялануучулары Россиянын Новосибирск шаарында угуусу начар спортчулар арасында волейбол боюнча эл аралык турнирде 3-орунга ээ болду.

Бишкек мэриясынан билдиришкендей, иш-чарага кыргыз спортчуларынан тышкары Казакстандын жана кабыл алган жактын волейболчулары катышты. Жалпысынан 10 команда оюн көрсөттү. Тайпанын машыктыруучусу Элмира Султаналиева.

Kategoriler
Kabar

Бишкекте кыргыз-кореялык биринчи бизнес-форуму өттү

Бишкек, 29.09.22. /Кабар/. Бишкектетекстиль жана өнөр жай тармагындагы кызматташтыкты арттыруу максатында кыргыз-кореялык биринчи бизнес-форуму болуп өттү.

“Кыргызиндустрия” ААКсынын басма сөз кызматынан кабарлашкандай, иш-чара Кыргызстандын Кореядагы элчилиги тарабынан уюштурулган.

Бизнес-форумга Кыргызстандын экономика жана коммерция министри Данияр Амангелдиев, Кореянын Кыргызстандагы элчиси Ли Вонджэ, “Кыргызиндустрия” ААКсынын президенти Жарасул Абдураимов жана эки өлкөнүн ишкер чөйрөлөрүнүн өкүлдөрү катышты.

Иш-чарада “Кыргызиндустрия” ААКнын президенти биргелешкен өнөр жайлык долбоорлорду ишке ашырууда, анын ичинде электромобилдерди жана электр менен иштеген жеңил коммерциялык жүк ташуучу автомобилдерди берүү жана куроо, жүндү жууп-тазалоо жана пахта жиптерди өндүрүү, текстилден жана трикотаждан буюмдарды жасоо процесстерине заманбап технологияларды киргизүү боюнча кызматташууга даяр экендиктерин билдирди.

“Кыргызиндустрия” ААКсынын тышкы экономикалык байланыштар жана соода боюнча вице-президенти А. Байышбеков Корея тараптын катышуусу менен ишке ашырууга мүмкүн болгон жибек өндүрүүнү, синтетика жана жасалма булалардан кездеме токууну жандандыруу боюнча долбоорлорду презентациялады.

Kategoriler
Kabar

Кыргызстандык ишкерлер Германия жана Польшага барышты

Бишкек, 28.09.22. /Кабар/. 19-24-сентябрда Кыргызстандан 20 компаниянын өкүлдөрү Германияда болушту. Бул тууралуу Кыргызстандын Германиядагы элчилигинен билдирди.

Маалыматка ылайык, Кыргызстандын бизнес жана мамлекеттик органдардын өкүлдөрүнүн Германияга иш сапары Германия эл аралык кызматташтык коомунун “Жашыл экономика жана жеке секторду туруктуу өнүктүрүү” программасынын алкагында уюштурулду.

Кыргызстандык компаниялардын өкүлдөрү Ганновер жана Берлин шаарларында өткөн эл аралык көргөзмөлөргө катышты.

“21-сентябрда Кыргызстандын Германиядагы элчилигинде кыргыз бизнесинин өкүлдөрү менен жолугушуу болуп, анда экономикалык чөйрөдө кыргыз-герман кызматташтыгын өнүктүрүү боюнча пикир алмашуу болду. Кыргызстандын ишкерлерине элчиликтин экономика тармагындагы аракети тууралуу маалымат берилип, германиялык тарап менен кызматташууну жигердетүү боюнча Кыргызстандын ишкерлеринин конкреттүү сунуштары талкууланды.

Ошондой эле кыргыз бизнесинин өкүлдөрүнүн Германиянын агробизнес ассоциациясынын жетекчилиги менен жолугушуусу уюштурулуп, анда айыл чарба тармагында кызматташууну түзүү маселелери кеңири талкууланды. Герман тарап Кыргызстан менен айыл чарба тармагында кызматташууну өнүктүрүүгө кызыкдар экенин белгиледи”, – деп айтылат маалыматта.

Ал эми 24-25-сентябрда кыргызстандык ишкерлер Польшанын Познань шаарында өткөн “Агро Шоу” эл аралык айыл чарба эл аралык көргөзмөгө катышты. Польшага болгон иш сапардын алкагында Кыргызстандын бизнес өкүлдөрү Польшанын айыл чарба машиналары жана жабдуулары боюнча Соода-өнөр жай палатасынын жетекчилиги, агробизнес тармагындагы ар түрдүү дүйнөлүк компаниялардын өкүлдөрү менен жолугуп, кызыккан маселелерди талкуулоо менен бирге айыл чарба жаатында алдыңкы технологиялар жана жабдуулар менен таанышты.

26-сентябрда бизнес чөйрөсүнүн өкүлдөрү Кыргыз-польша бизнес форумуна катышып, анда 20 кыргызстандык жана 25 польшалык компаниянын өкүлдөрү эки мамлекет ортосундагы кызматташтыкты түзүүнүн жолдорун кеңири талкуулашты.

Мындан тышкары, кыргызстандык ишкерлер Польшанын Crimea аттуу саркынды сууларды тазалоочу ишканасында жана Horus Energia электр генераторлорун чыгаруучу заводдо болушту.

Кыргызстандык компаниялардын өкүлдөрүнүн Польшага болгон иш сапары жана Кыргыз-польша бизнес-форуму КР Соода-өнөр жай палатасынын Германия жана Польшадагы өкүлү А.Исмаилов тарабынан Польшанын инвестиция жана соода агенттиги менен биргеликте уюштурулду.

Kategoriler
Kabar

КР чек арачылары тажикстандык аскерлердин Достук айылына минометтук чабуулун басышты

Бшкек, 17.09.22. /Кабар/. 17-сентябрь саат 11:30да КР УКМКнын Чек ара кызматынын бөлүмдөрү Тажикстандын аскер кызматкерлеринин Достук айылына минометтук чабуулун басышты. Бул тууралуу КР УКМКнын Чек ара кызматы билдирет.

Маалыматка ылайык, андан кийин саат 12:30дан 12:35ке чейин тажик тарап Баткен районунун Төрт-Көчө аймагында Кыргызстандын Ички иштер министрлигинин Ички аскерлеринин позицияларын жана бөлүктөрүн аткылашты.

“Учурда атышуу токтотулду. Окуя боюнча иликтөө иштери башталды”, – деп айтылат маалыматта.

Kategoriler
Kabar

Президент Садыр Жапаров Самарканддан кайтып келди

Бишкек, 16.09.22. /Кабар/. Президент Садыр Жапаровдун Самарканд шаарында (Өзбекстан Республикасы) өткөн Шанхай кызматташтык уюмуна мүчө-мамлекеттердин башчыларынын кеңешинин жыйынына катышуусу аяктады. Бул тууралуу президенттин басма сөз кызматынан кабарлашты.

Саммиттин ишине ШКУ өлкөлөрүнүн лидерлери катышты. Алар: Кыргыз Республикасы, Индия Республикасы, Казакстан Республикасы, Кытай Эл Республикасы, Пакистан Ислам Республикасы, Россия Федерациясы, Тажикстан Республикасы жана Өзбекстан Республикасы.

Бир катар өлкөлөр байкоочу жана ардактуу конок катары катышты.

Келгенден кийин Садыр Жапаров Өзбекстандын Биринчи Президенти Ислам Каримовдун “Хазрати Хизр” комплексиндеги мүрзөсүнө гүл коюп, анын элесин эскерди.

Ушул эле күнү Кыргызстандын аймагындагы тилкеде “Кытай-Кыргызстан-Өзбекстан” темир жолун куруу долбоору боюнча үч тараптуу кызматташтык Макулдашуусуна кол коюлду.

Андан соң, мамлекет башчысы Кытайдын төрагасы Си Циньпин, Ирандын президенти Сайед Раиси, Россиянын президенти Владимир Путин, Өзбекстандын президенти Шафкат Мирзиёев жана Пакистандын премьер-министри Шахбаз Шариф менен эки тараптуу сүйлөшүүлөрдү өткөрдү.

Ошондой эле, президент башка өлкөлөрдүн лидерлери менен бирге көчөт отургузуу аземине катышып, «Түбөлүк шаар» туристтик комплексин кыдырды.

ШКУнун Саммити өткөн күнү катышуучуларды тосуп алуу аземи, мамлекет башчыларынын тар жана кеңейтилген курамдагы жолугушуулары өттү.

Садыр Жапаров өз сөзүндө ШКУнун алкагында ар тараптуу кызматташтыкты тереңдетүүнүн маанилүүлүгүн белгиледи.

Иш-чаранын жыйынтыгында өлкө лидерлери Уюмга мүчө мамлекеттердин ортосундагы өз ара пайдалуу кызматташтыкты өнүктүрүүгө багытталган бир катар көп тараптуу документтерге кол коюшту.

Ошону менен бирге ШКУнун Саммитинин алкагында Садыр Жапаров Тажикстандын президенти менен мамлекеттик чек аранын кыргыз-тажик тилкесиндеги кырдаал боюнча сүйлөшүүлөрдү өткөрдү.

Өлкө лидерлери ок атышууну токтотуу жана согуштук линиядан күчтөрдү жана каражаттарды чыгарып кетүүнү макулдашты.

Бүгүн, 16-сентябрда, мамлекет башчысы Бишкек шаарына кайтып келди.

Kategoriler
Kabar

Самаркандда ШКУ саммитинин жыйынтыгында бир катар көп тараптуу документтерге кол коюлду

Бишкек, 16.09.22. /Кабар/. Президент Садыр Жапаров бүгүн, 16-сентябрда, Самарканд шаарында Шанхай кызматташтык уюмуна (ШКУ) мүчө-мамлекеттердин Мамлекет башчыларынын кеңешинин жыйынына катышты.

Жыйын Өзбекстан Республикасынын президенти Шавкат Мирзиёевдин төрагалыгы астында өттү.

ШКУга мүчө-мамлекеттердин мамлекет башчыларынын кеңешинин жыйынынын жыйынтыгында лидерлер төмөнкү документтерге кол коюшту:

  1. Шанхай кызматташтык уюмуна мүчө-мамлекеттердин Мамлекет башчыларынын кеңешинин Самарканд декларациясы.
  2. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчө-мамлекеттердин Узак мөөнөттүү ынак коңшулук, достук жана кызматташтык жөнүндө келишиминин жоболорун ишке ашыруу боюнча 2023-2027-жылдарга карата Комплекстүү иш-аракеттер планы жөнүндө чечими.
  3. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчө-мамлекеттердин Өз ара байланышты өнүктүрүү жана натыйжалуу транспорт коридорлорун түзүү боюнча кызматташуу концепциясы жөнүндө чечими.
  4. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмунун ишмердүүлүгүн өркүндөтүү жөнүндө чечими.
  5. Шанхай кызматташтык уюмуна мүчө-мамлекеттердин Мамлекет башчыларынын кеңешинин “Шанхай кызматташтык уюмунун ыктыярдуу элчиси” ардактуу наамы тууралуу жобо жөнүндө чечими.
  6. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчө-мамлекеттердин Өз ара эсептешүүдө улуттук валюталардын үлүшүн акырындык менен жогорулатуу боюнча жол картасы жөнүндө чечими.
  7. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчө-мамлекет макамын алуу максатында Иран Ислам Республикасынын милдеттенмелери тууралуу меморандумга кол коюу жөнүндө чечими.
  8. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчөлүккө Беларусь Республикасын кабыл алуу жол-жобосун баштоо жөнүндө чечими.
  9. Шанхай кызматташтык уюмуна мүчө-мамлекеттердин Мамлекет башчыларынын кеңешинин Бахрейн Королдугуна Шанхай кызматташтык уюмунун пикир алышуу боюнча өнөктөшү макамын берүү жөнүндө чечими.
  10. Шанхай кызматташтык уюмуна мүчө-мамлекеттердин Мамлекет башчыларынын кеңешинин Мальдив Республикасына Шанхай кызматташтык уюмунун пикир алышуу боюнча өнөктөшү макамын берүү жөнүндө чечими.
  11. Шанхай кызматташтык уюмуна мүчө-мамлекеттердин Мамлекет башчыларынын кеңешинин Мьянма Союзу Республикасына Шанхай кызматташтык уюмунун пикир алышуу боюнча өнөктөшү макамын берүү жөнүндө чечими.
  12. Шанхай кызматташтык уюмуна мүчө-мамлекеттердин Мамлекет башчыларынын кеңешинин Бириккен Араб Эмирликтерине Шанхай кызматташтык уюмунун пикир алышуу боюнча өнөктөшү макамын берүү жөнүндө чечими.
  13. Шанхай кызматташтык уюмуна мүчө-мамлекеттердин Мамлекет башчыларынын кеңешинин Кувейт Мамлекетине Шанхай кызматташтык уюмунун пикир алышуу боюнча өнөктөшү макамын берүү жөнүндө чечими.
  14. Шанхай кызматташтык уюмуна мүчө-мамлекеттердин Мамлекет башчыларынын кеңешинин Варанаси шаарын (Индия Республикасы) 2022-2023-жылдары Шанхай кызматташтык уюмунун туристтик жана маданий борбору деп жарыялоо тууралуу чечими.
  15. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмунун Катчылыгы менен Бириккен Улуттар Уюмунун ортосундагы билим берүү, илим жана маданият боюнча (2023-2027-жылдары) меморандумга кол коюу жөнүндө чечими.
  16. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмунун Башкы катчысынын Шанхай Кызматташтык Уюмунун өткөн жылдагы ишмердүүлүгү тууралуу баяндамасы боюнча чечими.
  17. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмунун Аймактык антитеррордук түзүм кеңешинин 2021-жылдагы ишмердүүлүгү боюнча отчету жөнүндө чечими.
  18. Шанхай кызматташтык уюмуна мүчө-мамлекеттердин Мамлекет башчыларынын кеңешинин Шанхай кызматташтык уюмуна мүчө-мамлекеттердин Мамлекет башчыларынын кеңешинин чечимдеринин аракеттерин токтотуу жөнүндө чечими.
  19. Шанхай кызматташтык уюмуна мүчө-мамлекеттердин Мамлекет башчыларынын кеңешинин Климаттын өзгөрүшүнө чара көрүү боюнча аракеттер тууралуу билдирүүсү (кол коюусуз кабыл алынат).
  20. Шанхай кызматташтык уюмуна мүчө-мамлекеттердин Мамлекет башчыларынын кеңешинин Жүк жеткирүүнүн ишенимдүү, туруктуу жана диверсификациялан чынжырчасын камсыз кылуу боюнча билдирүүсү (кол коюусуз кабыл алынат).
  21. Шанхай кызматташтык уюмуна мүчө-мамлекеттердин Мамлекет башчыларынын кеңешинин Эл аралык азык-түлүк коопсуздугун камсыз кылуу тууралуу билдирүүсү (кол коюусуз кабыл алынат).
  22. Шанхай кызматташтык уюмуна мүчө-мамлекеттердин Мамлекет башчыларынын кеңешинин Энергетикалык коопсуздукту камсыз кылуу тууралуу билдирүүсү (кол коюусуз кабыл алынат).

Мындан сырткары, жыйындын алкагында төмөнкү документтерге да кол коюлду:

  1. Шанхай кызматташтык уюмуна мүчө-мамлекеттердин Туризм тармагында кызматташуусу жөнүндө өкмөттөр ортосундагы макулдашуусу.
  2. Шанхай кызматташтык уюмуна мүчө-мамлекет макамын алуу максатындагы Иран Ислам Республикасынын милдеттенмелери тууралуу меморандум.
  3. Египет Араб Республикасына Шанхай кызматташтык уюмунун пикир алышуу боюнча өнөктөшү макамын берүү жөнүндө меморандум.
  4. Сауд Арабия Королдугуна Шанхай кызматташтык уюмунун пикир алышуу боюнча өнөктөшү макамын берүү жөнүндө меморандум.
  5. Катар Мамлекетине Шанхай кызматташтык уюмунун пикир алышуу боюнча өнөктөшү макамын берүү жөнүндө меморандум.
  6. Шанхай кызматташтык уюмуна мүчө-мамлекеттердин ыйгарым укуктуу органдарынын ортосунда Соода кызматын көрсөтүү чөйрөсүндө кызматташуунун алкактык негиздери.
  7. Шанхай кызматташтык уюмуна мүчө-мамлекеттердин ыйгарым укуктуу органдарынын ортосунда Музей иштери чөйрөсүндө кызматташуу жөнүндө меморандум.
  8. Шанхай кызматташтык уюмуна мүчө-мамлекеттердин ыйгарым укуктуу органдарынын ортосунда Өсүмдүктөрдүн карантини жаатында кызматташуу жөнүндө макулдашуу.
  9. Шанхай кызматташтык уюмуна мүчө-мамлекеттердин ыйгарым укуктуу органдарынын ортосунда Энергиянын кайра жаратуу булактарын пайдалануу жаатында кызматташуу программасы.
  10. Шанхай кызматташтык уюмунун мейкиндигинде инфратүзүмдүк өнүктүрүү программасы.
  11. Шанхай кызматташтык уюмуна мүчө-мамлекеттердин ишкер чөйрөлөрүнүн ортосунда Өнөр жай кооперациясын стимулдаштыруу программасы.
  12. Шанхай кызматташтык уюмунун ыйгарым укуктуу органдарынын ортосунда Санариптик сабаттуулукту өнүктүрүү программасы.
  13. Шанхай кызматташтык уюмуна мүчө-мамлекеттердин ыйгарым укуктуу органдарынын ортосунда Жасалма интеллектти өнүктүрүү боюнча кызматташуу программасы.
  14. Шанхай кызматташтык уюмуна мүчө-мамлекеттердин медицина уюмдарынын ортосунда Жугуштуу ооруларды алдын алуу жана дарылоо маселелери жаатында кызматташуу боюнча жол картасы.
  15. Шанхай кызматташтык уюмуна мүчө-мамлекеттердин ортосунда Артыкчылыктуу багыттар боюнча илимий-техникалык жактан кызматташуу жаатында иш-аракеттер планы (2022-2025-жылдарга).
  16. Шанхай кызматташтык уюмунун алкагында Ички региондук сооданы өнүктүрүү боюнча биргелешкен иш-аракеттер планы.
  17. Шанхай кызматташтык уюмуна мүчө-мамлекеттердин Саламаттык сактоо министрликтеринин телемедицина жаатында кызматташуу концепциясы.
  18. Шанхай кызматташтык уюмуна мүчө-мамлекеттердин ыйгарым укуктуу органдарынын “Акылдуу” айыл чарбасы жана агроинновациялар жаатында өз ара аракеттенүү концепциясы.
  19. Шанхай кызматташтык уюмунун Катчылыгы менен Араб Мамлекеттер Лигасынын Башкы катчылыгынын ортосунда меморандум.
  20. Шанхай кызматташтык уюмунун Катчылыгы менен Бириккен улуттар уюмунун ортосунда Билим берүү, илим жана маданият маселелери боюнча өз ара түшүнүшүү жөнүндө меморандум (2023-2027-жылдарга).
  21. Шанхай кызматташтык уюмунун Катчылыгы менен БУУнун Азия – Тынч океан экономикалык жана социалдык комиссиянын (АТЭСК) ортосунда өз ара түшүнүшүү жөнүндө меморандум.
  22. Шанхай кызматташтык уюмунун Катчылыгы менен “Астана” эл аралык каржы борборунун ортосунда Өз ара түшүнүшүү жөнүндө меморандумду жүзөгө ашыруу боюнча 2022-2025-жылдарга карата иш-чаралар планы.
Kategoriler
Kabar

Садыр Жапаров менен Владимир Путин жолукту

Бишкек, 15.09.22. /Кабар/. Президент Садыр Жапаров бүгүн, 15-сентябрда, Самарканд шаарында (Өзбекстан Республикасы) Россия Федерациясынын президенти Владимир Путин менен жолугушту. Бул тууралуу президенттин маалымат кызматынан кабарлашты.

Жолугушуу жүрүшүндө эки өлкөнүн лидерлери кыргыз-орус эки тараптуу өз ара аракеттенүүсүнүн актуалдуу маселелерин, түрдүү тармактарда өз ара пайдалуу байланыштарды өнүктүрүүнүн абалын жана келечегин талкуулашты.

Президент Садыр Жапаров эки өлкөнүн ортосундагы мамилелер эки тараптуу негизде да, эл аралык уюмдардын жана интеграциялык бирикмелердин алкагында да жогорку динамикасы менен өзгөчөлөнөрүн белгиледи.

Ал Россия салттуу түрдө Кыргызстандын алдыңкы соода-экономикалык өнөктөштөрүнүн бири экенин баса белгиледи. Мамлекет башчысы үстүбүздөгү жылдын биринчи жарым жылдыгында өз ара сооданын олуттуу – өткөн жылга салыштырмалуу эки эсе өсүшү катталганын белгиледи.

«Инвестициялык долбоорлор, анын ичинде Россия-Кыргыз өнүктүрүү фондунун колдоосу менен ийгиликтүү жылып жатат. Бүгүнкү күндө Фонд 440 миллион долларга жакын 3200дөн ашык долбоорду жактырды», — деди ал.

Кыргыз-орус кызматташтыгынын дагы бир приоритеттүү багыты гуманитардык тармак экенин белгилеп, Садыр Жапаров Кыргыз Республикасынын аймагында орус тилинде окутуулар менен жалпы билим берүүчү мектептердин курулушунун башталышы күтүлүп жатканын кошумчалады,

Президент Садыр Жапаров бүгүнкү жолугушуу кыргыз-орус көп кырдуу кызматташтыгын мындан ары да чыңдоого жана эки тараптуу күн тартибинде турган маселелерди иш жүзүндө ишке ашырууга көмөктөшөөрүнө ишеним билдирди.

Өз кезегинде Россиянын президенти Владимир Путин Россия менен Кыргызстан жакын өлкөлөр, стратегиялык өнөктөштөр жана бир катар регионалдык уюмдардын алкагында биргелешип иш алып барган союздаштар экенин белгиледи.

«Россия Кыргызстандын алдыңкы соода-экономикалык өнөктөшү бойдон калууда. Өткөн жылы товар жүгүртүүнүн өсүшү байкаларлык болсо, быйыл көлөмү өсүүдө жана абдан жакшы темпте. Өткөн жылы ал 46,6% өскөн. Бул абдан жакшы көрсөткүч», — деди ал.

Владимир Путин орус тарап Кыргызстанга экономикалык колдоо көрсөтүүнү улантып жатканын жана өзгөчө кырдаалдар жана табигый кырсыктарды жоюу жаатында техникалык жардам көрсөтүүгө даяр экенин баса белгиледи. Ал ушул жылдын июлунда Россия Федерациясынын Өкмөтүнүн Кыргыз Республикасына өрт өчүрүүчү жана тик учак техникаларын жеткирүү боюнча токтомуна кол коюлганын, бул максаттарга орус бюджетинен дээрлик 1,5 миллиард рубль бөлүнгөнүн билдирди.

Владимир Путин ошондой эле Россия менен Кыргызстандын ортосундагы маданий-гуманитардык байланыштарды өнүктүрүүгө көңүл бурду.

Сүйлөшүүнүн соңунда мамлекет башчылары биргелешкен күн тартибин мазмундуу толтуруу үчүн ар кандай багыттар боюнча өз ара пайдалуу кызматташтыкты улантууга даяр экендиктерин билдиришти.

Kategoriler
Kabar

Садыр Жапаров: Кыргызстан менен Кытайдын ортосунда чечилбеген саясий маселелер жок

Бишкек, 15.09.22. /Кабар/. Кыргызстан менен Кытайдын ортосунда эки тараптуу кызматташтыкты өнүктүрүүгө тоскоол болуп, чечилбеген саясий маселелер жок. Бул тууралуу президент Садыр Жапаров Кытайдын төрагасы Си Цзиньпин менен болгон жолугушууда билдирди.

Президенттин басма сөз кызматынан кабарлашкандай, тараптардын жолугушуусу бүгүн, 15-сентябрда Өзбекстандын Самарканд шаарында ШКУга мүчө мамлекеттердин башчыларынын кеңешинин отурумунун алкагында өткөн.

Жолугушууда мамлекет башчылары кыргыз-кытай эки тараптуу кызматташтыгынын актуалдуу маселелерин, жогорку деңгээлдеги макулдашуулардын жана түрдүү тармактарда биргелешкен долбоорлордун ишке ашырылышынын жүрүшүн талкуулашты.

Президент Садыр Жапаров жогорку деңгээлдеги диалогдун жолго коюлушу ар тараптуу стратегиялык өнөктөштүктүн кыргыз-кытай мамилелеринин бардык спектрин активдештирүү үчүн дем берүүчү таасирин тийгизгенин белгиледи.

«Кыргызстан менен Кытайдын ортосунда эки тараптуу кызматташтыкты өнүктүрүүгө тоскоол болуп, чечилбеген саясий маселелер жок», — деди Садыр Жапаров.

Президент Садыр Жапаров КЭР төрагасы Си Цзиньпинди Кыргызстанга келип кетүүгө чакырды.

«Бул сапар Кыргызстан менен Кытайдын ортосундагы ынак коңшулаштыкты, достукту жана кызматташтыкты чыңдоого жана өнүктүрүүгө, эки тараптуу мамилелерди сапаттуу жаңы деңгээлге көтөрүүгө чоң салым болоруна ишенем», — деди ал.

Өз кезегинде КЭР төрагасы Си Цзиньпин президент Садыр Жапаров менен ушул жылдын февралында болгон жолугушуу жемиштүү болгонун, бул сүйлөшүүлөрдүн жүрүшүндө бир катар макулдашуулар жетишилгенин белгиледи.

«Сиз мамлекет башчысы катары реформаларды жүргүзүү жана Кыргызстан элинин бакубаттуулугун жогорулатуу үчүн чоң күч-аракет жумшап жатасыз, бул сиздердин калк арасында чоң колдоо тапты. Сиздин жетекчилигиңиз астында Кыргыз Республикасы ишенимдүү өнүгөт деп ишенем», — деди КЭР төрагасы.

Си Цзиньпин Кытай Кыргызстандын реформаларды өткөрүү боюнча аракеттерин колдоорун баса белгиледи.

Белгилей кетсек, Садыр Жапаровдун КЭР төрагасы Си Цзиньпин менен Самарканд шаарындагы жолугушуусунун жыйынтыгында бир катар документтер кабыл алынды.

Kategoriler
Kabar

Россия Кыргызстан менен Тажикстанга чек ара маселесин чечүүгө көмөктөшүүгө даяр – РФ ТИМи

Бишкек, 15.09.22. /Кабар/. Россиянын Тышкы иштер министрлиги Кыргызстан менен Тажикстандын бийликтерин чек арадагы чагымчылдыкты токтотуу үчүн бардык чараларды көрүүгө чакырып, чек ара маселелерин узак мөөнөттүү чечүүгө көмөктөшүүгө даяр экенин билдирди. Бул тууралуу министрликтин сайтындагы билдирүүгө таянып, РИА Новости маалымдайт.

“Кыргызстан менен Тажикстандын президенттеринин ортосунда түзүлгөн келишимдерди эске алуу менен биз эки тарапты кырдаалды саясий-дипломатиялык талаага кайтаруу үчүн бардык зарыл чараларды көрүүгө жана ар кандай чагымчылдыкты биргелешип токтотууга чакырабыз”, – деп айтылат маалыматта.

РИА Новостиге буга чейин Россиянын Тышкы иштер министрлигиндеги булак билдиргендей, Москва Кыргызстан менен Тажикстандын чек арасындагы кырдаалга тыкыр көз салып жатат жана жергиликтүү бийлик тез арада кырдаалды көзөмөлгө алат деп үмүттөнөт.

Kategoriler
Kabar

Кыргызстан менен Түркиянын ортосундагы кызматташтыктын келечеги талкууланды

Бишкек, 14.09.22. /Кабар/. 2022-жылдын 13-сентябрында Кыргызстандын Түркиядагы элчиси Кубанычбек Өмүралиев Адилеттүүлүк жана өнүгүү партиясынын негиздөөчүсүнүн бири, Түркиянын Улуу Улуттук жыйынынын депутаты Али Ихсан Арслан менен жолугушту. Бул тууралуу элчиликтин басма сөз кызматынан кабарлашты.

Маалыматка ылайык, жолугушуунун жүрүшүндө мамлекеттердин ортосундагы эки тараптуу кызматташтыктын маселелери талкууланды жана алакаларды мындан ары өнүктүрүү келечеги боюнча пикир алмашышты.