01

Кыргыз танкисттери “Танк биатлону-2022” сынагына даярданууну баштады

Бишкек, 04.08.22. /Кабар/. Кыргыз танкисттери “Танк биатлону-2022” эл аралык сынагына даярданууну баштады. Бул тууралуу Коргоо министрлигинин басма сөз кызматы билдирет.

Маалыматка ылайык, Кыргызстандын Куралдуу күчтөрүнүн командасы “Алабино” тактикалык-окуу комплексине келди.

“Учурда танк экипаждары сооттехникасын кабыл алып, бир сыйра жүргүзүп байкоо жана анын куралдарынан текшерип атууларды аткарышты, ошондой эле алдыдагы мелдешүүнүн маршрутунун жана анын өзгөчөлүктөрү менен таанышты”, – деп айтылат билдирүүдө.

Белгилей кетсек, былтыркы оюндардын жыйынтыгы боюнча 1-дивизиондун катарына кирген кыргызстандык танкисттерди быйылкы жылы Азербайжан, Беларусь, Казакстан, Кытай жана Россиянын күчтүү командалары менен атаандаштык күтөт.

“Танк биатлону-2022” эл аралык сынагы 13-августтан 27-августка чейин Россияда өтүп, анда Европа, Азия, Африка жана Латын Америка өлкөлөрүнүн 22 командасы катышат. Сынак жеке жарыш, жарым финал жана “Эстафета” финалдык этаптарынан турат.

Турнирдин катышуучуларынын жарыш талаасында туура багыт алуу, танкты башкаруу, окту таамай атуу жана ок атууну башкаруу боюнча жөндөмдүүлүктөрү бааланат.

Эскерте кетсек, 1-август күнү кыргыз танкисттери “Танк биатлону-2022” мелдешине катышуу үчүн Россияга жөнөп кеткен.

Bu makaleyi paylaş

Share on facebook
Share on google
Share on twitter
Share on linkedin
Share on pinterest
Share on print
Share on email